గంగూలీ బయోపిక్ తీయాలనుకున్న సుశాంత్

దిశ, స్పోర్ట్స్: మాజీ కెప్టెన్ ధోనీ బయోపిక్ సూపర్ హిట్ కావడంతో ఆ వెంటనే మరి కొందరు క్రీడాకారుల బయోపిక్ తీయాలని బాలీవుడ్ నటుడు సుశాంత్ సింగ్ రాజ్‌పూత్ అనుకున్నాడట. ఈ క్రమంలో బీసీసీఐ అధ్యక్షుడు సౌరవ్ గంగూలీ వద్దకు తన టీంను పంపించాడు. బయోపిక్ తీయడానికి హక్కులు ఇవ్వాలని గంగూలీని ఆ టీం అభ్యర్థించింది. కానీ, గంగూలీ మాత్రం తన జీవిత కథను తెరకెక్కించొద్దని చెప్పాడట. హక్కులు ఇవ్వడానికి సిద్ధంగా లేనని చెప్పాడట. ఈ విషయం విని సుశాంత్ చాలా బాధపడినట్లు సన్నిహితులు చెప్పారు. మరోవైపు గ్రేట్ కాళీ బయోపిక్ తీయాలనుకున్నా కుదరలేదు. మరోవైపు సుశాంత్ హీరోగా ఫుట్‌బాల్ స్టార్ బైచింగ్ భూటియా సినిమాను తీయాలని ‘జిల్లా ఘజియాబాద్’ ఫేమ్ ఆనంద్ సిద్ధపడ్డారు. భూటియా కూడా సినిమాకు ఓకే చెప్పాడు. ఇందులో భూటియా పర్సనాలిటీకి తగ్గట్లు ఉండే సుశాంత్‌ను తీసుకుందామని అనుకున్నారు. కానీ, ఇంతలోనే సుశాంత్ ఆత్మహత్య చేసుకున్నాడని, ఇప్పడు ఆ పాత్రలో సుశాంత్ తప్ప మరొకరిని ఊహించుకోలేక పోతున్నానని ఆనంద్ కుమార్ ఆవేదన వ్యక్తం చేశారు.