డీఎస్పీగా భారత స్టార్ స్ప్రింటర్ హిమదాస్‌

దిశ, స్పోర్ట్స్: ఇండియన్ స్టార్ స్ప్రింటర్ హిమదాస్‌ను డిప్యూటీ సూపరింటెండెంట్ ఆఫ్ పోలీస్ (డీఎస్పీ)గా నియమించాలని అస్సాం ప్రభుత్వం నిర్ణయించింది. సీఎం సర్బానంద సోనోవాల్ అధ్యక్షతన బుధవారం జరిగిన కేబినెట్ మీటింగ్‌లో ఈ మేరకు నిర్ణయం తీసుకున్నారు. రాష్ట్రంలోని క్రీడాకారులను ప్రభుత్వ విభాగాల్లోని పలు శఆఖల్లో క్లాస్-1, క్లాస్-2 అధికారులుగా నియమించాలని, ఈ మేరకు క్రీడా విధానాన్ని సవరించాలని కేబినెట్‌లో నిర్ణయించారు. ఇందులో భాగంగా అంతర్జాతీయ స్థాయిలో రాణిస్తున్న భారత స్ప్రింటర్ హిమదాస్‌కు డీఎస్పీ హోదాలో ఉద్యోగం ఇవ్వాలని తీర్మానించారు. ఒలంపిక్స్, ఆసియా క్రీడలు, కామన్వెల్త్ క్రీడల్లో పతకాలు సాధించిన వారిని క్లాస్-1 అధికారులుగా, ప్రపంచ చాంపియన్‌షిప్ విజేతలను క్లాస్-2 ఉద్యోగులుగా నియమించాలని క్రీడా విధానాన్ని మార్చారు. ఈ మేరకు హిమదాస్‌ను డీఎస్పీగా నియమించినట్లు సీఎం సోనోవాల్ తన అధికారిక ట్విట్టర్‌లో పేర్కొన్నారు. హిమదాస్‌ను డీఎస్పీగా నియమించడంపై కేంద్ర క్రీడ, యువజన శాఖ మంత్రి కిరణ్ రెజిజు అస్సాం ప్రభుత్వాన్ని అభినందించారు. హిమదాస్ ప్రస్తుతం ఒలంపిక్స్ క్రీడల కోసం సన్నద్దం అవుతున్నారు.