Sarfaraz Khan Marriage: కశ్మీర్ యువతిని పెళ్లాడిన ముంబయి క్రికెటర్.. ఫోటోలు, వీడియోలు వైరల్!
ముంబయికి చెందిన క్రికెటర్ సర్ఫరాజ్ ఖాన్.. వైవాహిక జీవితంలోకి అడుగుపెట్టాడు.
దిశ, వెబ్డెస్క్: ముంబయికి చెందిన క్రికెటర్ సర్ఫరాజ్ ఖాన్.. వైవాహిక జీవితంలోకి అడుగుపెట్టాడు. జమ్ముకశ్మీర్కు చెందిన అమ్మాయిని పెళ్లి చేసుకున్నాడు. వీరి వివాహ వేడుక.. వధువు స్వస్థలం షోపియాన్లో ఘనంగా జరిగింది. సర్ఫరాజ్ వివాహానికి సంబంధించి ఫొటోలు, వీడియోలు ప్రస్తుతం సామాజిక మాధ్యమాల్లో వైరల్గా మారాయి. వివాహానికి సంబంధించిన ఫొటోలను సర్ఫరాజ్ ఖాన్ సోషల్ మీడియాలో పంచుకున్నాడు. ఈ సందర్భంగా క్రికెటర్లు సూర్యకుమార్ యాదవ్, రుతురాజ్ గైక్వాడ్, ఖలీల్ అహ్మద్, హర్షిత్ రాణా, క్రిస్ గేల్, ఆకాశ్ దీప్, అభిషేక్ పోరెల్, మన్దీప్ సింగ్ తదితరులు శుభాకాంక్షలు తెలిపారు. అయితే వివాహ వేడుక సందర్భంగా జుమ్ముకశ్మీర్ లోకల్ మీడియా.. టీమ్ఇండియాలోకి సర్ఫరాజ్ ఎంట్రీ ఎప్పుడు అని ప్రశ్నించారు. "దేవుడు నిర్ణయిస్తే ఏదో ఒకరోజు కచ్చితంగా భారత్ తరఫున ఆడుతాను" అని సమాధానం ఇచ్చాడు. జమ్మూకశ్మీర్కు చెందిన అమ్మాయిని వివాహం చేసుకోవడం విధి నిర్ణయమని చెప్పాడు.
ముంబయికి చెందిన 25 ఏళ్ల సర్ఫరాజ్ ఖాన్ టీమ్ఇండియాలో ఎంట్రీ కోసం కొన్నాళ్లగా వేచిచూస్తున్నాడు. దేశవాళీ క్రికెట్లో రికార్డులు సృష్టిస్తున్నప్పటికీ టీమ్ ఇండియాలోకి అతడికి పిలుపు రావడం లేదు. ఇదే విషయమై గత కొన్నిరోజులు సర్ఫరాజ్ ఖాన్ అసంతృప్తిగా ఉన్నాడు. పరోక్షంగా సెలక్టర్లపై విమర్శలు సైతం చేశాడు. సర్ఫరాజ్ ఖాన్ ఇప్పటివరకు 39 ఫస్ట్క్లాస్ మ్యాచ్లు ఆడాగా.. 74.14 సగటుతో 3,559 పరుగులు సాధించాడు. ఇందులో 13 సెంచరీలు ఉన్నాయి. 301* అతడి బెస్ట్ స్కోర్. ప్రస్తుతం సర్ఫరాజ్ ఖాన్ ఇండియన్ ప్రీమియర్ లీగ్లో దిల్లీ క్యాపిటల్స్ జట్టు తరఫున ఆడుతున్నాడు.