ఐదు వికెట్లతో చెలరేగిన జాన్సన్.. పాక్‌కు ఆసిస్ షాక్

దిశ, స్పోర్ట్స్ : పాకిస్తాన్ చేతిలో వన్డే సిరీస్‌ కోల్పోయిన ఆస్ట్రేలియా..టీ20 సిరీస్‌ను కైవసం చేసుకుని సొంతగడ్డపై పరువు కాపాడుకుంది. వరుసగా రెండో మ్యాచ్‌లోనూ నెగ్గడంతో సిరీస్ ఆ జట్టు వశమైంది. సిడ్నీ వేదికగా శనివారం జరిగిన రెండో టీ20లో 13 పరుగుల తేడాతో పాక్‌‌ను ఓడించింది. స్పెన్సర్ జాన్సన్(5/26) ఐదు వికెట్లతో ఆసిస్ విజయంలో కీలక పాత్ర పోషించాడు.టీ20ల్లో పాక్‌పై ఆస్ట్రేలియాకు ఇది వరుసగా 6వ విజయం. ముందుగా బ్యాటింగ్ చేసిన కంగారుల జట్టును హరిస్ రవూఫ్(4/22), అబ్బాస్ అఫ్రిది(3/17), సుఫియాన్ ముఖీమ్(2/21) కట్టడి చేశారు. మాథ్యూ షార్ట్(32) టాప్ స్కోరర్. ఆస్ట్రేలియా కష్టంగా నిర్ణీత ఓవర్లలో పోరాడే స్కోరు 147/9 చేసింది. అనంతరం మోస్తరు లక్ష్యాన్ని ఆసిస్ కాపాడుకుంది. జాన్సన్ ఐదు వికెట్లతో చెలరేగడంతో ఛేదనలో తడబడిన పాక్ 19.4 ఓవర్లలో 134 పరుగులకే ఆలౌటైంది. ఉస్మాన్ ఖాన్(52), ఇర్ఫాన్ ఖాన్(37 నాటౌట్) పోరాటం వృథా అయ్యింది. నామమాత్రపు మూడో టీ20 సోమవారం జరగనుంది.