దెబ్బకు మాట మార్చిన అంబటి రాయుడు.. ‘అట్లుంటది మరీ కోహ్లీ ఫ్యాన్స్‌తో’ అంటూ ట్రోల్స్..!

దిశ, వెబ్‌డెస్క్: టీమిండియా మాజీ క్రికెటర్ అంబటి రాయుడు ఇటీవల ఆర్సీబీ, విరాట్ కోహ్లీ ఫ్యాన్స్‌లో చేతిలో ఘోరమైన ట్రోలింగ్‌కు గురైన సంగతి తెలిసిందే. ఆర్సీబీ, విరాట్ కోహ్లీపై రాయుడు చేసిన ట్వీట్సే ఇందుకు కారణమయ్యాయి. ఈ సీజన్ ఐపీఎల్‌లో ప్లే ఆఫ్స్‌ చేరాలంటే తప్పక గెలవాల్సిన మ్యాచ్‌లో చెన్నైపై ఆర్సీబీ విజయం సాధించింది. తద్వారా చెన్నెను వెనక్కి నెట్టి ఆర్సీబీ ప్లే ఆఫ్స్‌కు దూసుకెళ్లింది. అయితే, ఎలిమినేటర్ మ్యాచ్‌లో ఆర్సీబీ రాజస్థాన్ చేతిలో ఓటమి పాలై ఐపీఎల్ నుండి నిష్క్రమించింది. దీంతో ఆర్సీబీ, స్టార్ బ్యాటర్ కోహ్లీని చులకన చేసేలా అంబటి రాయుడు ట్వీట్స్ చేశారు. చెన్నైపై నెగ్గగానే ఆర్సీబీ టైటిల్ గెల్చినట్లు ఓవర్ యాక్షన్ చేసిందని.. ఆరెంజ్ క్యాప్ గెలిస్తే ఐపీఎల్ టైటిల్ రాదని పరోక్షంగా కోహ్లీని ఉద్దేశిస్తూ ట్వీట్స్ చేశాడు.

ఈ ట్వీట్స్‌పై ఆర్సీబీ, కోహ్లీ ఫ్యాన్స్ మండిపడ్డారు. అంబటి రాయుడుని ట్రోల్ చేయడంతో పాటు అతడి కుటుంబ సభ్యులపై కూడా అసభ్యకర కామెంట్స్ చేశారు. ఆర్సీబీ, కోహ్లీ ఫ్యాన్స్ దెబ్బతో అంబటి రాయుడు ప్లేట్ ఫిరాయించాడు. అనూహ్యంగా అంబటి రాయుడు కొత్త రాగం అందుకున్నాడు. విరాట్ కోహ్లీపై సడెన్‌గా ప్రశంసలు కురిపించాడు. త్వరలో అమెరికా, వెస్టిండీస్ వేదికగా జరగనున్న టీ-20 వరల్డ్ కప్ గురించి రాయుడు మాట్లాడుతూ.. ఈ వరల్డ్ కప్‌లో టీమిండియా విజయాల్లో విరాట్ కోహ్లీ బ్యాటింగ్ కీలకం కానుందని అభిప్రాయం వ్యక్తం చేశాడు. కోహ్లీ అగ్రెసిస్‌నెస్, దూకుడు తనం ఇండియాకు కలిసి వస్తాయని కొనియాడాడు.

ఇప్పటి వరకు చాలా వరల్డ్ కప్‌‌లు కోహ్లీ ఎక్స్‌పీరియన్స్ టీమిండియాకు ప్లస్ అవుతాయన్నాడు. విరాట్ కోహ్లీ టీమిండియాలో కీలక ఆటగాడని.. అతడో బిగ్ ప్లేయర్ అని రాయుడు ఆకాశానికెత్తాడు. గత టీ20 వరల్డ్ కప్‌లో పాకిస్థాన్‌తో జరిగిన మ్యాచ్‌లో కోహ్లీ ఆడిన చిరస్మరణీయ ఇన్నింగ్సే అతడి ప్రతిభకు నిదర్శనమని అన్నారు. అయితే, రాయుడు సడెన్‌గా కోహ్లీపై ప్రశంసలు కురిపించడం క్రీడా వర్గాల్లో చర్చనీయాంశంగా మారింది. మొన్నటి వరకు విమర్శలు చేసిన రాయుడు.. కోహ్లీ అభిమానులు దెబ్బకు ప్లేట్ ఫిరాయించాడని నెట్టింట్లో జోక్‌లు పేలుతున్నాయి. అట్లుంటది మరీ కోహ్లీ ఫ్యాన్స్‌తో అని నెటిజన్స్ కామెంట్స్ చేస్తు్న్నారు.