కాంగ్రెస్ MP విచిత్ర లీలలు.. సోషల్ మీడియాలో వైరలు

దిశ, ఫీచర్స్ : కాంగ్రెస్ MP శశి థరూర్ ఈ ఏడాది ఓనమ్‌ వేడుకలను చాలా ఉత్సాహంతో జరుపుకున్నారు. పసుపు రంగు కుర్తా, తెల్లటి పంచె ధరించిన ఈయన.. కేరళలోని ఓ ఆలయంలో కొబ్బరికాయ కొడుతున్న చిత్రంతో పాటు ఓనమ్ సెలబ్రేషన్స్‌కు సంబంధించి ఆయన పాల్గొన్న మరికొన్ని చిత్రాలు ఇప్పుడు సోషల్ మీడియాలో సరికొత్త మీమ్ ట్రెండ్‌గా మారాయి. కాగా ఆ చిత్రాలతో నెటిజన్లు రూపొందించిన కొన్ని మీమ్స్‌ను శశిథరూర్ కూడా సరదాగా రీట్వీట్ చేయడం విశేషం.

గుడిలో ఆచారం ప్రకారం కొబ్బరికాయ కొడుతున్న ఫొటోను షేర్ చేసిన శశిథరూర్.. నాయర్లు అందరూ పూజించే నాగదేవతలను ప్రార్థించానని చెప్పాడు. కేరళలోని ఎలివంచెరి భగవతీ క్షేత్రం వద్ద తీసిన ఈ ఫొటోతో అనేక ఫన్నీ మీమ్స్ సృష్టించబడ్డాయి. ఆయన కొబ్బరికాయ కొడుతున్న స్టిల్‌ను క్రికెట్ ఆడుతూ రన్‌అవుట్ కోసం థ్రో విసిరినట్టుగా, టీ షాపులో చాయ్ చేస్తున్నట్టుగా, మరో ఫొటోలో క్లాసికల్ డ్యాన్స్ చేస్తున్నట్టుగా మార్ఫింగ్ చేశారు.

వీటితో పాటు చాకిరేవులో బట్టలు ఉతుకుతున్నట్టుగా, బాక్సింగ్ రింగ్‌లో ప్రత్యర్థి తల పగులగొడుతున్నట్లుగా క్రియేట్ చేసిన చిత్రాలు ఇంటర్నెట్‌లో వైరల్‌గా మారాయి. ఇందులో కొన్ని మీమ్స్ పట్ల ఇంప్రెస్ అయిన థరూర్.. తన ట్విట్టర్ అకౌంట్‌లో షేర్ చేశారు. దీంతో నెటిజన్లు ఆయన సెన్స్ ఆఫ్ హ్యూమర్‌ను ప్రశంసిస్తున్నారు. ఫన్నీ మీమ్స్/కామెంట్స్‌ను స్పోర్టివ్‌గా తీసుకున్న ఆయన స్టైల్‌ను ఇతర రాజకీయ నాయకులు చూసి నేర్చుకోవాలని సూచిస్తున్నారు.