ఎంపీ ఇంట్లో దొంగతనం.. భారీగా నగదు, నగలు చోరీ

దిశ, వెబ్ డెస్క్: ఎంపీ ఇంట్లో దొంగతనం జరిగిన సంఘటన బీహార్ లో చోటు చేసుకుంది. పోలీసులు నిందితుడి కోసం గాలిస్తున్నారు. పోలీసులు తెలిపిన వివరాల ప్రకారం.. బీహార్ కు చెందిన మహిళా ఎంపీ రమాదేవి వద్ద 17 ఏళ్ల నుంచి అశోక్ అనే వ్యక్తి డ్రైవర్ గా పనిచేస్తున్నాడు. అయితే, పార్లమెంటు సమావేశాలకు హాజరయ్యేందుకు ఆమె ఇటీవల ఢిల్లీకి వెళ్లింది. ఆమెను పాట్నాలోని విమానాశ్రయం వద్ద విడిచిపెట్టిన డ్రైవర్ అనంతరం అక్కడి నుంచి ఆమె ఇంటికి వెళ్లాడు. అతడి వద్ద ఉన్నటువంటి ఫేక్ తాళం చేతులతో ఇంట్లోకి ప్రవేశించాడు. బీరువాలో ఉన్న రూ. 7.50 లక్షల నగదు, రూ. 16 లక్షలు విలువ చేసే నగలు ఎత్తుకెళ్లాడు. విషయం తెలుసుకున్న ఎంపీ పోలీసులకు ఫిర్యాదు చేసింది. కేసు నమోదు చేసుకున్న పోలీసులు పరారీలో ఉన్న అశోక్ కోసం గాలిస్తున్నారు. ప్రస్తుతం అతను ఢిల్లీలో తలదాచుకున్నట్లు తెలిసిందని, ఆ విషయాన్ని ఢిల్లీ పోలీసులకు తెలియజేశామని, వారు కూడా అక్కడ అతని కోసం గాలిస్తున్నారని పోలీసులు తెలిపారు.