కాంగ్రెస్ నాయకుల ముందస్తు అరెస్ట్

దిశ, నేలకొండపల్లి : రచ్చబండకు వెళ్తున్న నేలకొండపల్లి కాంగ్రెస్ నాయకులను ముందస్తు అరెస్ట్ చేశారు. టీపీసీసీ అధ్యక్షుడు రేవంత్ రెడ్డి, సీఎల్పీ నేత, మధిర నియోజకవర్గం శాసనసభ్యులు మల్లు భట్టి విక్రమార్క పిలుపు మేరకు గజ్వేల్ నియోజకవర్గం ఎర్రవల్లిలో జరుగుతున్న కాంగ్రెస్ రచ్చబండ కార్యక్రమానికి వెళ్తున్నా కాంగ్రెస్ నాయకులను సోమవారం వేకువజామునే నేలకొండపల్లి పోలీసులు ముందస్తు అరెస్టు చేసి స్టేషన్‌కు తరలించారు. ఈ సందర్భంగా వారు మాట్లాడుతూ.. అక్రమ అరెస్టులు చేయడం హేయమైన చర్యగా అభివర్ణించారు. అరెస్టు చేసిన వారిలో పాలేరు నియోజకవర్గ సేవాదళ్ కన్వీనర్ బచ్చల కూరి నాగరాజు, ఖమ్మం జిల్లా యువజన కాంగ్రెస్ ప్రధాన కార్యదర్శి జెర్రిపోతుల అంజని, నేలకొండపల్లి మండల యువజన కాంగ్రెస్ నాయకులు ఎడవల్లి నాగరాజు, పగిడి కత్తుల సుదర్శన్‌లు ఉన్నారు. వీరిని ముందస్తు అరెస్టు చేసి పోలీస్ స్టేషన్‌లో నిర్బంధించారు.