స్నానం కోసం చెరువులో దిగి శవమై తేలాడు

దిశ, షాబాద్ : ఉమ్మడి రంగారెడ్డి జిల్లాలో దారుణం చోటుచేసుకుంది. స్నానం కోసం చెరువులో దిగిన వ్యక్తి శవమై తేలాడు. ఈత రాకపోవడంతో ప్రమాదవశాత్తు నీటిలో మునిగి చనిపోయినట్టు తెలుస్తోంది. ఈ ఘటన షాబాద్ మండలానికి చెందిన పహిల్వాన్ చెరువులో శనివారం వెలుగుచూసింది. షాబాద్ సర్కిల్ ఇన్‌స్పెక్టర్ అశోక్ కథనం ప్రకారం.. బైండ్ల యాదయ్య(30) కూలి పని చేస్తూ జీవనం సాగించేవాడు. పని ముగిసిన తర్వాత యాదయ్య తోటి పని వారు అయిన చిట్యాల యాదయ్య, బ్యాగరి వెంకటేష్‌లతో కలిసి షాబాద్ మండలం మరియాపూర్ గ్రామంలో ఒక ఫంక్షన్ కు హాజరయ్యేందుకు వెళ్లారు.

తిరిగి వస్తున్న క్రమంలో సుమారు మధ్యాహ్నం 2 గంటల ప్రాంతంలో ముగ్గురు స్నానం కోసం చెరువులో దిగారు. ప్రమాదవశాత్తు యాదయ్య అదుపు తప్పి చెరువులో పడిపోయాడు. ఈత రాకపోవడంతో నీటిలో మునిగి మరణించాడు. విషయం తెలుసుకున్న కుటుంబ సభ్యులు, పోలీసులు ఘటనా స్థలికి హుటాహుటిన చేరుకుని నీటిలో గాలించగా అప్పటికే మృతిచెందినట్టు గుర్తించారు. మృతుని తండ్రి ఫిర్యాదు మేరకు కేసు నమోదు చేసుకుని దర్యాప్తు చేస్తున్నట్టు తెలిపారు.