OU PHD విద్యార్థి అరెస్ట్.. మావోయిస్టులతో సంబంధాలు.?

దిశ, వెబ్‌డెస్క్ : ఓయూలో పీహెచ్‌డీ విద్యార్థిని పోలీసులు అరెస్ట్ చేశారు. మావోయిస్టులతో సంబంధాలున్నాయన్న ఆరోపణలతో పెద్దపల్లి జిల్లా అప్పన్నపేటకు చెందిన కోటా శ్రీనివాస్ గౌడ్‌ను పోలీసులు అరెస్ట్ చేశారు. వివరాల ప్రకారం.. హైదరాబాద్‌లోని బౌద్ధనగర్‌లో నివాసం ఉంటున్న శ్రీనివాస్ ఉస్మానియా యూనివర్సిటీలో పీహెచ్‌డీ చదువుతూ.. టీవీఎస్ రాష్ట్ర అధ్యక్షుడిగానూ కొనసాగుతున్నారు. అయితే, శ్రీనివాస్‌గౌడ్‌కు మావోయిస్టులతో సంబంధాలున్నట్టు పోలీసులకు సమాచారం అందింది. ఈ నేపథ్యంలో ఆయన ఉంటున్న ఇంటితోపాటు, ఓయూ హాస్టల్‌లో సోదాలు నిర్వహించారు.

ఈ సందర్భంగా పలు పత్రాలు, నిషేధిత సాహిత్యం, అనుమానిత వస్తువులను స్వాధీనం చేసుకున్నట్టు సమాచారం. మావోయిస్టు కీలక నేతలతో నేరుగా సంప్రదించడంతోపాటు వారి సమావేశాలకు కూడా హాజరైనట్టు పోలీసులు గుర్తించారు. ఈ నేపథ్యంలో శ్రీనివాస్‌ను అదుపులోకి తీసుకున్న పోలీసులు ఆయనపై పలు సెక్షన్ల కింద కేసు నమోదు చేసి దర్యాప్తు చేస్తున్నారు.