Israel-Hezbollah ceasefire: ఇజ్రాయెల్- హెజ్ బొల్లా కాల్పుల విరమణపై భారత్ హర్షం

దిశ, నేషనల్ బ్యూరో: పశ్చిమాసియాలో ఉద్రిక్తతల వేళ కీలక పరిణామం జరిగింది. ఇజ్రాయెల్‌-హెజ్‌బొల్లా మధ్య కాల్పుల విరమణ (Israel-Hezbollah ceasefire) ఒప్పందం జరిగింది. ఈనిర్ణయంపై భారత్‌ హర్షం వ్యక్తం చేసింది. ఈ మేరకు కేంద్ర విదేశాంగ శాఖ (MEA) బుధవారం ప్రకటన విడుదల చేసింది. ‘‘ఇజ్రాయెల్‌ (Israel), లెబనాన్‌ మధ్య కాల్పుల విరమణ ఒప్పందాన్ని మేం స్వాగతిస్తున్నాం. ఉద్రిక్తతలు తగ్గించుకోవాలని, సంయమనం పాటించాలని, చర్చలు, దౌత్యపరమైన మార్గాల్లోనే సమస్యను పరిష్కరించుకోవాలని మేం ఎప్పుడూ కోరుతున్నాం. ఈ పరిణామాలతో పశ్చిమాసియాలో మళ్లీ శాంతి, స్థిరత్వం వస్తాయని మేం విశ్వాసంగా ఉన్నాం’’ అని విదేశాంగశాఖ అధికార ప్రతినిధి రణ్‌ధీర్‌ జైస్వాల్‌ వెల్లడించారు. ఇకపోతే, ఈ నిర్ణయాన్ని ప్రపంచ దేశాలతో సహా ఐక్యరాజ్యసమితి కూడా స్వాగతించాయి. కాల్పుల విరమణతో ఉద్రిక్తతలకు ముగింపు లభించే అవకాశం ఉందని ఆశాభావం వ్యక్తం చేశాయి.

ఇజ్రాయెల్ ప్రధాని ఏమన్నారంటే?

ఇకపోతే, 60 రోజులపాటు కొనసాగే ఈ విరమణ ఒప్పందానికి మంగళవారం ఇజ్రాయెల్‌ భద్రతా వ్యవహారాల కేబినేట్ ఆమోదం తెలిపింది. అమెరికా మధ్యవర్తిత్వంతో ఈ ఒప్పందం కుదిరింది. దీనిపై ఇజ్రాయెల్‌ ప్రధాని బెంజమిన్‌ నెతన్యాహు (Benjamin Netanyahu) స్పందించారు. అమెరికా అధ్యక్షుడు జో బైడెన్‌ Joe Biden)కు ధన్యవాదాలు తెలిపారు. అయితే, ఈ ఒప్పందం ఎన్ని రోజులు ఉంటుందనేది లెబనాన్‌ పైనే ఆధారపడి ఉందన్నారు. ‘‘మేం ఒప్పందాన్ని అమలు చేస్తాం. కానీ, ఉల్లంఘనలు జరిగితే మాత్రం ప్రతిస్పంన తీవ్రంగా ఉంటుంది. విజయం సాధించేవరకు మేం ఐక్యంగా పోరాడుతాం’’ అని నెతన్యాహు స్పష్టం చేశారు.