అగ్ని-5 మిస్సైల్ ప్రయోగం సక్సెస్.. చైనాకు చెక్.. ఎలా ?

దిశ, నేషనల్ బ్యూరో : ‘మిషన్ దివ్యాస్త్ర’లో భాగంగా అగ్ని-5 క్షిపణికి సంబంధించిన తొలి ఫ్లైట్ టెస్ట్‌ను సోమవారం భారత్ విజయవంతంగా నిర్వహించింది. 5వేల కి.మీలకు మించిన దూరంలోని లక్ష్యాలను ఛేదించగలిగే సత్తా ఈ మిస్సైల్‌కు ఉంది. మల్టిపుల్ ఇండిపెండెంట్లీ టార్గెటబుల్ రీ ఎంట్రీ వెహికల్ (ఎంఐఆర్‌వీ) టెక్నాలజీతో పనిచేసేలా ఈ మిస్సైల్‌ను రక్షణ పరిశోధన అభివృద్ధి సంస్థ (డీఆర్‌డీఓ) తయారు చేసింది. ఒకే క్షిపణి వివిధ రకాల వార్ హెడ్ల నుంచి ప్రయోగించగల సామర్థ్యాలను సంతరించుకోవడమే ఎంఐఆర్‌వీ టెక్నాలజీ ప్రత్యేకత. స్వదేశీ ఏవియానిక్స్ సిస్టమ్‌లు, అధిక ఖచ్చితత్వపు సెన్సార్ ప్యాకేజీలను అగ్ని-5 మిస్సైల్‌లో జోడించారు. అగ్ని-5 ఫ్లైట్ టెస్ట్ సక్సెస్ అయిన సందర్భంగా డీఆర్‌డీఓ శాస్త్రవేత్తలకు ప్రధానమంత్రి నరేంద్రమోడీ అభినందనలు తెలిపారు. వారిని చూసి తాను గర్విస్తున్నట్లు చెప్పారు. ఈమేరకు ఆయన ఓ ట్వీట్ చేశారు.

చైనాకు చెక్

చైనా వద్ద డాంగ్‌ఫెంగ్-41 పేరుతో క్షిపణులు ఉన్నాయి. ఇవి 12,000 కి.మీ నుంచి 15,000 కి.మీ రేంజ్‌లోని లక్ష్యాలను ఛేదించగలవు. వాటికి పోటీగా భారత్ ‘అగ్ని -5’ మిస్సైల్ ప్రాజెక్ట్‌ను నిర్వహిస్తోంది. అగ్ని 1 నుంచి అగ్ని 4 దాకా మిస్సైళ్ల రేంజ్ 700 కి.మీ నుంచి 3,500 కి.మీల మధ్య ఉంటుంది. గతేడాది జూన్‌లో భారత్ అణు సామర్థ్యం కలిగిన అగ్ని-4 బాలిస్టిక్ క్షిపణిని విజయవంతంగా ప్రయోగించింది. గతేడాది అక్టోబర్‌లోనూ ఓ క్షిపణి పరీక్షను నిర్వహించింది. తాజాగా భారత్ విజయవంతంగా పరీక్షించిన అగ్ని-5 మిస్సైల్ ఆసియా ఖండంలోని పలు దేశాలు, చైనా ఉత్తర భాగంతో పాటు యూరప్‌లోని కొన్ని ప్రాంతాలను టార్గెట్ చేయగలదు. అగ్ని-5 క్షిపణి ప్రాజెక్టు డైరెక్టర్‌గా మహిళా మణి డాక్టర్ టెస్సీ థామస్ ఉన్నారు. ఆమెను ‘మిసైల్ ఉమెన్ ఆఫ్ ఇండియా’ అని కూడా పిలుస్తున్నారు. భారతదేశంలో క్షిపణి ప్రాజెక్టుకు నాయకత్వం వహించిన మొదటి మహిళా శాస్త్రవేత్తగా ఆమె రికార్డును నెలకొల్పారు.