లెజెండ్ బర్త్‌డే.. 40లోకి అడుగుపెట్టిన మహేంద్రసింగ్ ధోని

దిశ, వెబ్‌డెస్క్: మహేంద్రసింగ్ ధోని.. ప్రపంచ క్రికెట్‌లో ఈ పేరు ఓ సంచలనం. ప్రపంచవ్యాప్తంగా అత్యధికంగా క్రికెట్ అభిమానుల హృదయాల్లో చెదరని ముద్ర వేశాడు ధోని. టీమిండియా తరఫున ఏ కెప్టెన్ చేయలేని విధంగా.. వన్డే వరల్డ్ కప్, టీ20 వరల్డ్ కప్, ఛాంపియన్స్ ట్రోఫీ సాధించిన కెప్టెన్‌గా ధోనికి రికార్డు ఉంది. మైదానంలో కూల్‌గా ఉంటూనే.. జెట్ స్పీడ్‌లో స్టంప్ ఔట్, రనౌట్‌లు చేస్తూ అభిమానులను అలరిస్తుంటాడు. నేడు ధోని ప్రస్తావనకు కారణం.. మహేంద్రుడు 40వ ఏటలోకి అడుగుపెట్టాడు. ఈ ఒక్క వార్త ఇప్పుడు సోషల్ మీడియాను ఊపేస్తుంది. క్రికెటర్లు, సెలబ్రిటీల నుంచి ప్రపంచవ్యాప్తంగా ఉన్న నెటిజన్లు ధోనికి HappyBirthdayMSDhoni అంటూ ట్రెండ్ చేస్తున్నారు. జార్ఖండ్ రాజధాని రాంచీలో 1981, జులై 7న ధోని జన్మించిన సంగతి తెలిసిందే.