విషాదం.. అదృశ్యమైన బాలికలు చెరువులో విగతజీవులుగా..

దిశ, ముధోల్: నిర్మల్ జిల్లా తానూరు మండలం సింగన్‌గావ్ గ్రామంలో విషాదం చోటుచేసుకుంది. నిన్న సాయంత్రం అదృశ్యమైన ముగ్గురు బాలికలు.. ఈ రోజు ఉదయం చెరువులో విగతజీవులుగా కనిపించడం కలకలం రేపింది. వివరాల్లోకి వెళితే… సింగన్‌గావ్ గ్రామానికి చెందిన ఓ మహిళ, తన ఇద్దరు పిల్లలతో పాటు చుట్టం చూపుగా వచ్చిన ఇంకో అమ్మాయి కలిసి వ్యవసాయక్షేత్రానికి వెళ్లారు. ‘సాయంత్రం అవుతోంది.. మీరు ఇంటికి వెళ్లండి’ అని తల్లి చెప్పడంతో సదరు పిల్లలు సునీత (16), వైశాలి (14), అంజలి (14) ఇంటి బాట పట్టారు. కానీ, ఎంతకీ చేరుకోలేదు. రాత్రంతా గాలింపు చేపట్టిన ప్రయోజనం లేకుండా పోవడంతో.. కనిపించడం లేదని పోలీసులకు ఫిర్యాదు చేశారు. ఈ నేపథ్యంలోనే పిల్లల కోసం గాలింపు చేస్తున్న సమయంలో.. చెరువు గట్టుపై చెప్పులను గమనించారు గ్రామస్తులు. వెంటనే అక్కడికి చేరుకున్న పోలీసులు గజఈతగాళ్ల సాయంతో గాలింపు చేపట్టి.. మృతదేహాలను వెలికితీశారు. సెల్ఫీ దిగుతున్న సమయంలో ముగ్గురు పిల్లలు నీటిలో పడిపోయి ఉంటారని గ్రామస్తులు భావిస్తున్నారు. పిల్లల మృతిపై కేసు నమోదు చేసుకున్న పోలీసులు ప్రమాదమా.. హత్య జరిగిందా అన్న కోణంలో విచారణ చేపట్టారు.