వైరల్‌గా మారిన మంత్రి పువ్వాడ పెంపుడు కుక్క

దిశ, వెబ్ డెస్క్ : మంత్రి పువ్వాడ అజయ్ కుమార్ పెంపుడు కుక్క ఇప్పుడు సోషల్ మీడియాలో హల్ చల్ చేస్తోంది. వరలక్ష్మీవ్రతం సందర్భంగా ఆ కుక్కపిల్లకి చేసిన అలంకరణ నెట్టింట హాట్ టాపిక్ గా మారింది. మంత్రిగారి కుక్కపిల్లకి పట్టుపరికిణీతోపాటు మెడలో బెల్ట్ కి బదులు పచ్చలహారం వేయడం అందరినీ ఒకింత ఆశ్చర్యానికి గురిచేసినా… పెద్దోళ్ల ఇంట్లో ఇవన్నీ కామనే కదలే అని నిట్టూరుస్తున్నారట ఆ ఫోటోలు చూసినవారు.

కాగా ఈ ఫోటో పువ్వాడ యువసేన అనే వాట్సాప్ గ్రూపులో పువ్వాడ ఎమ్మెల్యే పేరుతో పోస్ట్ అయింది. పొందిగ్గా కూర్చున్న ఆ కుక్కపిల్ల ఫోటోను వాట్సాప్ గ్రూప్ లో షేర్ చేస్తూ ‘మై క్యూటీ’ అంటూ క్యాప్షన్ కూడా ఇచ్చారు పువ్వాడ ఎమ్మెల్యే. ఆ కాన్వర్జేషన్ లో వరలక్ష్మీవ్రతం సందర్భంగా అలా అలంకరించినట్టు తెలుస్తోంది. ఇక ఈ ఫోటో పెట్టగానే ఒక్కొక్కరు ఒక్కోలా స్పందించారు. కొందరు మీ కుక్క సూపర్ అంటుంటే.. మరొకరు మాకు డబుల్ బెడ్ రూమ్ రాలేదంటూ గుర్తు చేస్తున్నారు. ఇప్పుడు ఆ స్క్రీన్ షాట్స్ సోషల్ మీడియాలో వైరల్ అయ్యాయి.

దీంతో కొందరు భిన్నాభిప్రాయాలు వ్యక్తం చేస్తున్నారు. “కొందరు జంతుప్రేమికులు నిజంగానే చాలా క్యూట్ గా ఉంది అని మురిసిపోతున్నారు. మరికొందరేమో లక్కీ కుక్క.. మంత్రిగారింట్లో పెరగాలంటే అదృష్టం చేసుకుని ఉండాలి, లేదంటే వరలక్ష్మీవ్రతానికే పచ్చలహారం వేస్తే… పుట్టినరోజులకి, పెద్ద పెద్ద పండగలకి హారాలు, వడ్డాణాలు వేస్తారేమో అని సెటైర్స్ వేస్తున్నారు. ఈ రాజకీయనాయకులకు పేదవాడి ఆకలి కనపడదు కానీ, వాళ్ళ ఇంట్లో పెరిగే పెంపుడు జంతువులకు మాత్రం పండగలు, పబ్బాలంటూ లక్షలు లక్షలు ఖర్చు చేస్తుంటారు” అని మరికొందరు గుసగుసలాడుకుంటున్నారు. ఏమాటకామాట మంత్రిగారి కుక్క పట్టుబట్టలు, బంగారు నగలతో చూడటానికి ‘క్యూట్’ గానే ఉంది సుమీ..!