మద్యం మత్తులో వాగ్వాదం.. వ్యక్తి దారుణ హత్య.!

దిశ, దుబ్బాక : సిద్దిపేట జిల్లా దుబ్బాక మండలం దుంపలపల్లి గ్రామంలో దారుణ ఘటన చోటుచేసుకుంది. గ్రామానికి చెందిన గొర్రెల కాపరి దొందడి రెడ్డయ్య(45)ను బుధవారం రాత్రి గుర్తు తెలియని దుండగులు దారుణంగా హత్య చేసినట్లు గ్రామస్తులు, బంధువులు తెలిపారు. వివరాల ప్రకారం.. రోజు మాదిరిగానే బుధవారం కూడా గొర్రెలను మేపి సాయంత్రం గొర్లను కొట్టంలో తోలి ఇంటి నుంచి బయటకు వెళ్లిన రెడ్డయ్యా మళ్లీ తిరిగి ఇంటికి రాలేదని కుటుంబ సభ్యులు తెలిపారు.

అయితే, గురువారం ఉదయం పొలం వద్దకు వెళ్లే దారిలో రెడ్డయ్య చనిపోయి కనిపించడంతో అందరూ ఒక్కసారిగా షాక్‌కు గురయ్యారు. విషయం తెలుసుకున్న కుటుంబ సభ్యులు పోలీసులకు సమచారం అందించారు. ఘటన స్థలానికి చేరుకున్న పోలీసులు కేసు నమోదు చేసుకుని దర్యాప్తు చేస్తున్నట్టు తెలిపారు.

ఈ సందర్బంగా సిద్దిపేట ఏసీపీ సైదులు మాట్లాడుతూ.. వృత్తి రీత్యా గొర్ల కాపరైన దొందడి రెడ్డయ్యను ఎవరో హత్య చేసినట్లు తెలుస్తోందన్నారు. రెడ్డయ్య శవం వద్ద మూడు మద్యం సీసాలు లభించాయని, తనతో పాటు ఇద్దరు వ్యక్తులు కలిసి మద్యం సేవించి.. తాగిన మైకంలో మాట మాట పెరిగి అతడిని హత్య చేసి ఉంటారని వెల్లడించారు. మృతుడి మెడపై కాట్లు, శరీరంపై దెబ్బలు, నోట్లో నుంచి రక్తం రావడం జరిగిందని ఏసీపీ చెప్పారు.

క్లూస్ టీం ఆధారంగా హంతకులను పట్టుకొని చట్టపరమైన చర్యలు తీసుకుంటామని హెచ్చరించారు. ఎంతటి వారైన ఇలాంటి నేరాలకు పాల్పడిన వారిని వదిలేది లేదన్నారు. మృతుడి భార్య మూడు రోజుల క్రితమే తన తల్లిగారింటికి వెళ్లిందని, అంతలోనే ఈ ఘటన జరగడంతో కుటుంబ సభ్యులు శోకసంద్రంలో మునిగిపోయారు.