దయ్యం పట్టిందని చెప్పి మాంత్రికుడి అత్యాచారం

దిశ, వెబ్‌డెస్క్: ఓ వైపు ప్రపంచం మొత్తం టెక్నాలజీలో దూసుకెళ్తున్నా అనాగరికులు మాత్రం మూఢ నమ్మకాలనే విశ్వసిస్తున్నారు. ప్రభుత్వాలు, స్వచ్ఛంద సంస్థలు పలు కార్యక్రమాలతో అవగాహన కల్పిస్తున్నా అస్సలు పట్టించుకోవడం లేదు. కొందరు భూత వైద్యులను సంపద్రించి ఉన్నకాడికి ఆస్తులు పోగొట్టుకుంటుండగా, మరికొందరు ఆర్థిక ఇబ్బందుల్లో పడుతున్నారు. కానీ ఇటీవల హైదరాబాద్‌లో జరిగిన సంఘటనలో ఓ మాంత్రికుడు మాయమాటలు చెప్పి మహిళపై అత్యాచారానికి పాల్పడ్డాడు. చివరకు మహిళ పోలీసులను ఆశ్రయించడంతో కటకటాల పాలయ్యాడు. దీనికి సంబంధించిన పూర్తి వివరాలు ఇలా ఉన్నాయి.

హైదరాబాద్ మల్కాజిగిరి పోలీస్‌స్టేషన్‌ పరిధిలోని మౌలాలిలో ఓ కుటుంబం నివాసం ఉంటోంది. దంపతులకు ముగ్గురు పిల్లలు ఉన్నారు. ఇటీవల ఆ కుటుంబంలో ఆర్థిక సమస్యలు రావడంతో భర్త.. నిజామాబాద్‌కు చెందిన యూనిస్‌ఖాన్‌ అనే 50 ఏళ్ల మాంత్రికుడిని సంప్రదించాడు. ఈ క్రమంలో ఫ్యామిలీకి సంబంధించిన విషయాలను మొత్తం తెలుసుకున్న ఆ మాంత్రికుడు అతని బలహీనతను ఆసరాగా చేసుకున్నాడు. కుటుంబంలో ఆర్థిక ఇబ్బందులతో పాటు ఇతర సమస్యలకు నీ భార్యే కారణమని, ఆమెకు దయ్యం పట్టడం వల్లే ఇంట్లో డబ్బులు మిగట్లేవని భయానికి గురిచేశాడు. ఆమెను తన దగ్గరకు తీసుకువస్తే దయ్యం వదిలిస్తానని మాయమాటలు చెప్పాడు.

రెండు మూడు రోజుల తర్వాత భార్యను మాంత్రికుడి దగ్గరకు తీసుకెళ్లిన భర్త.. అతను చెప్పినవన్నీ చేయాలని వెళ్లిపోయాడు. కొద్దిసేపటి తర్వత ఓ గదిలో పూజలు చేస్తున్నట్లు నటించిన మాంత్రికుడు మహిళకు మత్తు మందు ఇచ్చాడు. ఆమె మత్తులోకి జారుకున్నాక అత్యాచారం చేశాడు. తర్వాత ఇంటికి వచ్చిన మహిళ జరిగిన విషయాన్ని భర్తకు వివరించినా ఆయన పట్టించుకోలేదు. నీవల్లే ఇంట్లో ఆర్థిక సమస్యలు వస్తున్నాయని ఆమెపై కోపం చేశాడు. దీంతో బాధితురాలు వెళ్లి మల్కాజిగిరి స్టేషన్‌లో ఫిర్యాదు చేయగా… మాంత్రికుడు యూనిస్‌ ఖాన్‌ను పోలీసులు అరెస్ట్ చేశారు.