Road Accident: రాష్ట్రంలో ఘోర రోడ్డు ప్రమాదం.. అక్కడికక్కడే నలుగురు దుర్మరణం

దిశ, వెబ్‌డెస్క్: రోడ్డు ప్రమాదం (Road Accident)లో నలుగురు అక్కడిక్కడే దుర్మరణం పాలైన విషాద ఘటన విజయనగరం (Vizianagaram) జిల్లాలో శనివారం తెల్లవారుజామున చోటుచేసుకుంది. వివరాల్లోకి వెళితే.. శ్రీకాకుళం (Srikakulam) పట్టణానికి చెందిన ఐదుగురు వ్యక్తులు కలిసి కారులో విశాఖపట్నం (Vishakhapatnam)కు బయలుదేరారు. ఈ క్రమంలోనే కారు విజయనగరం జిల్లా (Vizianagaram District) భోగాపురం (Bhogapuram) పరిధిలోని పోలిపల్లి (Polipally) వద్దకు రాగానే అతివేగంతో అదుపుతప్పి బోల్తా కొట్టింది.

ఈ దుర్ఘటనలో కారులో ఉన్న నలుగురు అక్కడికక్కడే ప్రాణాలు కోల్పోయారు. మరొకరికి తీవ్ర గాయాలయ్యాయి. స్థానికుల సమాచారం మేరకు ఘటనా స్థలానికి చేరుకున్న పోలీసులు ప్రమాదం జరిగిన ప్రాంతాన్ని పరిశీలించారు. ఈ మేరకు గాయపడిన వ్యక్తిని చికిత్స నిమిత్తం సమీప ఆసుపత్రికి తరలించారు. అనంతరం కేసు నమోదు చేసుకుని దర్యాప్తు చేస్తున్నట్లు పోలీసులు తెలిపారు. డ్రైవర్ అతివేగం, అజాగ్రత్త వల్లే ప్రమాదం సంభవించినట్లుగా వారి ప్రాథమిక దర్యాప్తులో వెల్లడైనట్లుగా తెలుస్తోంది.