మీలోనే పుట్టినోణ్ణి
మీతోనే ఎదిగినోణ్ణి
మీతోనే నడుస్తు ఈ
లోకం తీరెరిగినోణ్ణి
ఈడకెళ్ళి యాడకెల్దునో
మిమ్మొదిలీ ఆడకెళ్ళి యాడబోదునో ॥
మీతోనే నేనుంటా
మీ ఇంటే నా పంటా
నిప్పులు చిమ్మే మీమీ
కలాల్లోనె నేనుంటా
జనకోపం మండే మీ
గళంలోనె నేనుంటా ॥ఈడ॥
మతం పిచ్చిపట్టినోళ్ళ
భరతం పట్టిస్తుంటా
గజ్జెల డమరుకమౌతూ
గుండెలదరగొడ్తుంటా
జాతుల చిచ్చునురేపే
మోసాల్ కనిపెడ్తుంటా
ప్రశ్నించే నాలుకనై
మీగొంతుకలో నేనుంటా ॥ఈడ॥
గిరిజనులందరి గుండై
ఎల్లప్పుడు తోడుంటా
పీడిత బహుజనులందరి
దండోరానై ఉంటా
కసితో రగిలే కళ్ళలొ
ఎర్రని మెరుపై ఉంటా ॥ఈడ॥
గుండెలరాగం పలికే
పాటై మీనోటుంటా
మీమాటల తూటానై
నిత్యం పేల్తూ ఉంటా
ఉద్యమాల ఊపిరితో
రగిలే మీలో ఉంటా
ధనస్వామ్యం కాల్చెటేల
చేతిలొ చిచ్చై ఉంటా ॥ఈడ॥
తీగల తుప్పల గుట్టల
నడిరేతిరి నడ్చెటేల
అరె 'ఛల్ భయ్-హుసారంటు'
ఊతకర్రనై ఉంటా ॥ఈడ॥
పోరుబాటలో మీతో
పోరుపాటనై ఉంటా
సోషలిజం వెలుగులకై
కదిలే మీముందుంటా
పదండి పోదాం అంటూ
వెన్నుతడు వస్తుంటా ॥ఈడ॥
పిచ్చిపట్టినోళ్ళ లెక్క
యీడేడల ఎతక్కుండ్రి
నిమ్మలంగ మనసువెట్టి
మీలో నన్నెతుక్కుండ్రి
మిమ్మొదిలీ యాడకెళ్ళలా...!
మీ గుండె గూటిలోనె ఉండినా
- ఏటుకూరి ప్రసాద్
నవచేతన పబ్లిషింగ్ హౌస్ సంపాదకులు
04027638247