గాయాల గేయం

వంచితుల గాయాల కాలాన్ని గజ్జెలు చేసి

జజ్జనకరి జనారేకి చిందేసిన పాదాలు

అధికారం అహంకారపు అంధకారం మీద

క్షిపణులై కురిసిన నిప్పుల అక్షర పాదాలు

దట్టమైన ఆకుపచ్చని అడవి దళంలో

బండలను చీల్చుకునిపారే సెలయేటి గళం

పరవశానికి పులకరించి పల్లవించిన పాటే

ప్రశ్నించే వేళ నిలువెత్తు విప్లవ ఆయుధం

అలలు అలలుగా అలుపెరుగకుండా

సాగిపోయే పల్లె పచ్చి గుండెల పాట

పల్లేరుకాయల దారిని పరిచయం చేస్తూ

గేయాల నిండా గాయాల కంజీర జీర

అమ్మ పాటే తనకి ప్రాణం పోసిందో

అసలు పాటకే తను ప్రాణం పోసాడో

సలసల మరిగే ధిక్కార రక్తనాళాల్లో

ప్రవహించేదంతా పాట పాట పాట

పీడిత ప్రజానీకానికి కలగన్న తీరం చూపేందుకు

యుద్ధనౌకగా తనతోతాను చేసిన యుద్ధం ఎంతో

వీపులో కాపురమున్న బుల్లెట్ కు తెలుసు

సగం నిండి సగం కాలిన కడుపులకు

సమాధానం అడిగే ఈ దేశపు సగం జనాభాకి

ఆ సగం నగ్నదేహమే అసలైన ప్రతీక

విరామమెరుగని పోరాటంలో

విశ్రాంతి ఎరుగని సైనికుడు పాడిన

చివరి పల్లవికి చితికూడా మొదటిసారి

అసలైన ఆరిపోని దగడును లోకమంతా చిమ్మింది

జోహార్ గద్దర్ అన్న

పెనుగొండ బసవేశ్వర్

94411 59615