నువ్వెళ్ళిపోయా

నువ్వెళ్ళిపోయాక

ఒక కిరణం దిశ తప్పి

దశను మార్చుకుని వెళ్ళింది

ముసురు కమ్మిన మస్తిష్కం

మసకబారిపోయింది

ఒక వసంతపు కాంతి పుంజం

చీకటితో చేయి కలిపినట్టు

పత్రాలుగా రాలిపోయింది

నువ్వెళ్ళిపోయాక

దిక్కులన్నీ ఒక్కటై కూడినట్టుగా

మూలాలన్నీ చెదిరిపోయి

హద్దులన్నీ తిరగబడినట్లు

మనసు స్థిరత్వం కోల్పోయింది

నువ్వు దూరమైపోయాక

ఆకల్ని మింగిన ఆలోచనొకటి

నిస్సారవంతమైన నేలపై పడుకుని

కలలకు మేత వేస్తూ

కడపటిదాకా నిరీక్షిస్తోంది

జ్ఞాపకాల సంద్రంలో

మునిగి తేలిపోతూనే

కెరటాలుగా మననం ఎగిసిపడుతోంది

నువ్వెళ్ళిపోయాక

లోకం మాయమైపోయినట్టు

శూన్యం చుట్టూ ఆవహించినట్టు

విరహవేదన పడగల కింద

దేహం మౌనంగా కూర్చుంది

మళ్ళీ వస్తావని

ఆశల్ని పోగు చేసుకుని

జాడకు ఎదురేగుతోంది

నరెద్దుల రాజారెడ్డి

96660 16636