సార్కోమా క్యాన్సర్ ఎవరికి ఎక్కువగా వస్తుంది.. ఈ వ్యాధి లక్షణాలేంటో చూసేద్దామా..

దిశ, వె‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌బ్‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌డెస్క్ : ఈ మధ్యకాలంలో చాలామంది ప్రాణాంతకమైన కొన్ని క్యాన్సర్ ల బారిన పడి మృత్యువాత పడుతున్నారు. క్యాన్సర్ లలో ఒక రకమే సార్కోమా. అయితే ఇది చాలా తక్కువ మందికి మాత్రమే వచ్చే అరుదైన క్యాన్సర్. ఈ క్యాన్సర్ మృదు కణజాలాలను దాని ఆహారంగా చేసుకుంటుంది. అంటే ఇది మృదు కణజాలం లేదా ఎముకల నుండి మొదలవుతుంది. ఇది శరీరంలోని ఏదైనా భాగాన్ని ప్రభావితం చేయవచ్చు. మరి ఈ క్యాన్సర్ గురించి నిపుణులు ఇంకా ఎలాంటి విషయాలు చెబుతున్నారో చూడండి.

సార్కోమా క్యాన్సర్ నరాలు, రక్తనాళాలు, ఫైబ్రోసెస్ లేదా కొవ్వు కణజాలాలు, మృదులాస్థి, స్నాయువులతో సహా శరీరంలోని బంధన కణజాలాలలో కూడా ఉద్భవించే అవకాశాలు ఉంటాయంటున్నారు నిపుణులు. ఈ ప్రమాదకరమైన క్యాన్సర్ ను చివరి స్టేజ్ వచ్చే వరకు కూడా గుర్తించలేరట. దీంతో చికిత్స అందించడం కష్టం అవుతుందంటున్నారు.

ఈ సార్కోమా క్యాన్సర్ కణితులు శరీరంలోని ఏ భాగంలోనైనా అభివృద్ధి చెందుతాయంటున్నారు. అయితే ఇవి సాధారణంగా తల, మెడ, ఛాతీ, చేతులు, కాళ్ళలో ఎక్కువగా కనిపిస్తాయట. సార్కోమా క్రమంగా శరీరం అంతటా వ్యాపించడం ప్రారంభించి ఏదైనా భాగాన్ని ప్రభావితం చేయవచ్చని చెబుతున్నారు.

సార్కోమా లక్షణాలు, రకాలు...

సార్కోమా లక్షణాలు దాని రకాన్ని బట్టి ఉండవచ్చు. అయితే గడ్డ ఏర్పడటం, నొప్పి వంటి లక్షణాలు కనిపించవచ్చు. ఇతర లక్షణాలు అలసట, జ్వరం, ఎటువంటి కారణం లేకుండా వేగంగా బరువు తగ్గడం, చర్మం మార్పులు, వాపు మొదలైనవి. కొంతమందికి చర్మం కింద గడ్డలు అనిపించవచ్చు. అవి నొప్పిలేకుండా ఉంటాయి. కొందరికి దాని పరిమాణం పెద్దదిగా మారే వరకు నొప్పి ఉండదు. మీరు అలాంటి సంకేతాలను శరీరంలో చూసినట్టయితే వీలైనంత త్వరగా వైద్యుడిని సంప్రదించాలంటున్నారు నిపుణులు. సార్కోమా అనేక రకాలుగా ఉంటుందట. ఇందులో ప్రధానంగా ఎముకల సార్కోమా, మృదు కణజాల సార్కోమా ఉంటాయి. ఈ అరుదైన క్యాన్సర్ చేతులు, కాళ్ళ మృదు కణజాలాలలో, ఎముకలలో పెరుగుతుంది. ఈ అరుదైన క్యాన్సర్‌ను కనుగొనడానికి బయాప్సీ చేస్తారని చెబుతున్నారు నిపుణులు.

ఎముకల సార్కోమా..

దాదాపు 80 శాతం సార్కోమా కేసులు మృదు కణజాలాలలో సంభవిస్తాయి. 20 శాతం ఎముకలు మాత్రమే సార్కోమాను అభివృద్ధి చేస్తాయంటున్నారు. ఎముకలలో సార్కోమా కారణాలు ఇంకా తెలియలేదని చెబుతున్నారు. ఎముకలలో అభివృద్ధి చెందే సార్కోమాలను ఆస్టియోసార్కోమా, కొండ్రోసార్కోమా, ఎవింగ్ సార్కోమా అని పిలుస్తారట. వాటి గురించి పూర్తి సమాచారాన్ని కలిగి ఉండటం ముఖ్యమంటున్నారు నిపుణులు.

ఆస్టియోసార్కోమా..

ఎముకలలో సంభవించే సార్కోమా ఎక్కువగా టీనేజర్లను ప్రభావితం చేస్తుందని చెబుతున్నారు. ఇది పొడవుగా ఉన్న చేతులు, కాళ్ళ ఎముకలలో ఉద్భవిస్తుందట. ఇది సాధారణంగా 10 సంవత్సరాల నుండి 19 సంవత్సరాల మధ్య యుక్త వయస్కుల్లో ఎక్కువగా కనిపిస్తుందని చెబుతున్నారు.

కొండ్రోసార్కోమా..

ఈ ప్రాణాంతక కణితి మృదులాస్థిలో ఉద్భవిస్తుంది. ఎముకలు, కీళ్ల మధ్య కదలికను అనుమతించడానికి మృదులాస్థి పనిచేస్తుందంటున్నారు. సాధారణంగా ఈ క్యాన్సర్ చేతులు, కాళ్ళ ఎముకలలో అభివృద్ధి చెందుతుందంటున్నారు. ఇది యువతలో కంటే పెద్దవారిలో ఎక్కువగా కనిపిస్తుందని చెబుతున్నారు.

ఈవింగ్ సార్కోమా..

ఈ క్యాన్సర్ సాధారణంగా పిల్లలు, యువకులలో ఎక్కువగా కనిపిస్తుందంటున్నారు. ఇది పక్కటెముకలు, భుజం బ్లేడ్‌లు, తుంటి, కాళ్ళు లేదా ఎముకలలో పెరుగుతుందని చెబుతున్నారు.

మృదు కణజాల సార్కోమా..

ఈ సార్కోమాలు శరీరంలోని మృదు కణజాలాలలో సంభవిస్తాయంటున్నారు. ఇందులో కండరాలు, కొవ్వు, రక్త నాళాలు ఉంటాయని చెబుతున్నారు. లిపోసార్కోమాతో సహా వివిధ రకాల మృదు కణజాల సార్కోమాలు ఉన్నాయంటున్నారు. ఇవి తరచుగా ఉదర అవయవాలలో సంభవిస్తాయని చెబుతున్నారు. అయితే లియోమియోసార్కోమా గర్భాశయం లేదా జీర్ణవ్యవస్థలో ఉద్భవిస్తుందని చెబుతున్నారు.

సార్కోమా కారణాలు..

సార్కోమాకు గల ఖచ్చితమైన కారణాల గురించి ఇంకా ఏమీ తెలియలేదంటున్నారు నిపుణులు. ఫౌండేషన్ ఆఫ్ అమెరికా ప్రకారం క్యాన్సర్ కణాలు వేగంగా పెరిగినప్పుడు, అవి కణితులను ఏర్పరుస్తాయంటున్నారు. రేడియేషన్ ఎక్స్పోజర్కు గురైన వ్యక్తులు సార్కోమా అభివృద్ధి చెందే ప్రమాదం ఉందంటున్నారు. అలాగే కొన్ని జన్యుపరమైన పరిస్థితులు అంటే కుటుంబం సభ్యులకు క్యాన్సర్ సిండ్రోమ్‌లు ఉన్నా వ్యాపిస్తాయంటున్నారు. ఇది మృదు కణజాల సార్కోమా ప్రమాదాన్ని పెంచుతుంది. రసాయనిక ఎక్స్పోషర్ లేదా రసాయన ప్రమాదాలకు గురికావడం వల్ల సార్కోమా వచ్చే అవకాశాలు పెరుగుతాయంటున్నారు నిపుణులు. సార్కోమాస్ ఏ వయస్సులోనైనా సంభవించవచ్చట. కానీ అవి పిల్లలు, టీనేజ్, యువకులలో ఎక్కువగా కనిపిస్తుందంటున్నారు నిపుణులు.

సార్కోమా చికిత్స..

ఈ వ్యాధి చికిత్స సార్కోమా రకం, పరిమాణం, దశ పై ఆధారపడి ఉంటుందంటున్నారు. దీని కోసం శస్త్రచికిత్స, కీమోథెరపీ, ఇమ్యునోథెరపీ, టార్గెటెడ్ థెరపీ, రేడియేషన్ థెరపీ వంటి చికిత్స అందించవచ్చంటున్నారు. సార్కోమా క్యాన్సర్‌ను గుర్తించడానికి పరీక్ష చేయించుకోవడం అవసరమని చెబుతున్నారు. ఇందుకోసం సీటీ ఎంఆర్‌ఐ స్కాన్, జెనెటిక్ చెకప్, ఎక్స్‌రే పరీక్షలు చేయించుకోవాలని సూచిస్తున్నారు. దాని చికిత్స సమయంలో కొన్ని దుష్ప్రభావాలు సంభవించవచ్చు. ఉదాహరణకు కీమోథెరపీ జుట్టు రాలడం, నోటిపూత, అలసట, వికారం, వాంతులు వంటి వాటికి కారణమవుతుంది.

* గమనిక : పైవార్తలోని సమాచారం ఇంటర్నెట్ ఆధారంగా సేకరించబడింది. పాఠకుల అవగాహనకోసం మాత్రమే అందిస్తున్నాం. నిర్ధారణలు, పర్యవసనాలకు ‘దిశ’ బాధ్యత వహించదు. ఆరోగ్యానికి సంబంధించిన నిర్ణయాలు తీసుకునే ముందు తప్పకుండా నిపుణులను సంప్రదించగలరు.