ప్రపంచంలో ఐదు నదులు కలిసే ఏకైక ప్రదేశం ఎక్కడ ఉందో తెలుసా..

దిశ, ఫీచర్స్ : చాలామంది ప్రజలు ప్రకృతి అందాల మధ్య ఉల్లాసంగా గడపాలని కోరుకుంటారు. నదులు, పర్వతాలను చూడడానికి ఇష్టపడని వారు ఎవరు ఉండరు. అయితే ఎక్కడైనా నదులు కలుస్తుంటే, ఆ ప్రాంత సౌందర్యం ఎంత అద్భుతంగా ఉంటుందో ఒక్కసారి ఆలోచించండి. రుద్రప్రయాగలో అలకనంద, మందాకిని నదుల సంగమం గురించి చాలా మందికి తెలుసు. ఇక్కడకు చేరిన తర్వాత ఎంతటి ఆనందం, ఆహ్లాదాన్ని పొందుతారో మాటల్లో చెప్పడం కష్టం. మరి ఐదు నదులు కలిసే ప్రదేశాన్ని చూస్తే ఎలా ఉంటుందో ఒక్కసారి ఆలోచించండి. ఇంతకీ ఈ ప్రదేశం ఎక్కడ ఉంది ఆ వివరాలను ఇప్పుడు తెలుసుకుందాం.

ఉత్తరప్రదేశ్‌కు చెందిన జలౌన్..

ఐదునదుల సంగమం గురించి చెప్పాలంటే, ఈ అందమైన ప్రదేశం ఉత్తరప్రదేశ్‌లోని జలౌన్ జిల్లాలో ఔరయ్యా, ఇటావా సరిహద్దులో ఉంది. ఐదు నదుల సంగమం కారణంగా ఈ ప్రాంతాన్ని పంచనాద్ అని పిలుస్తారు. మతపరమైన దృక్కోణంలో, ఈ ప్రదేశం చాలా పవిత్రమైనదిగా పరిగణిస్తారు. దీనిని మహాతీర్థరాజ్ అని కూడా పిలుస్తారు.

ఈ ఐదు నదుల సంగమం ..

పంచనాద్‌లో యమునా, చంబల్, సింధ్, పహాజ్, కున్వారీ నదుల సంగమం ఉంది. ఈ ప్రదేశానికి చారిత్రక ప్రాధాన్యత కూడా ఉంది. మహాభారత కాలంలో పాండవులు వనవాసం చేసిన సమయంలో ఇదే ప్రదేశం అని చెబుతారు. కార్తీక పూర్ణిమ సందర్భంగా ఇక్కడకు పెద్ద సంఖ్యలో భక్తులు తరలివస్తారు. ఈ సంగమం దగ్గర ముచ్కుంద్ మహారాజ్ ఆలయం కూడా ఉంది.

ప్రపంచంలోని ఏకైక ప్రదేశం..

పంచనాద్ చాలా ప్రత్యేకమైన ప్రదేశం, ఎందుకంటే ప్రపంచంలో ఐదునదులు కలిసే ప్రదేశం ఇదే అని చెబుతారు. సహజ ప్రదేశాలను దగ్గరగా అన్వేషించాలనుకుంటే లేదా ఆధ్యాత్మిక ప్రదేశాలను సందర్శించాలనుకుంటే పంచనాద్, ఐదు నదుల సంగమాన్ని జాబితాలో చేర్చవచ్చు.