రూ. 25 లక్షలు ఇచ్చి నకిలీ బంగారం కొన్నాడు

దిశ, ఏపీ బ్యూరో: దురాశ దుఃఖానికి చేటు అన్నది అక్షరాల కడప జిల్లాకి చెందిన బాల చెన్నారెడ్డికి సరిపోతుంది. ఎందుకంటే.. కడప జిల్లా ప్రొద్దుటూరుకి చెందిన బాల చెన్నారెడ్డికి కర్ణాటకకు చెందిన ఓ గ్యాంగ్ బళ్లారిలో ఇంటి పునాదులు తవ్వుతుండగా భారీగా బంగారం దొరికిందని, నాణాల రూపంలో ఉన్న బంగారాన్ని సులువుగా అమ్ముతామని చెప్పారు. 5 కేజీల బంగారం కేవలం 25 లక్షల రూపాయలేనని నమ్మకంగా చెప్పారు. దీంతో బాల చెన్నారెడ్డి వారి మాటలు నిజమేనని నమ్మి బంగారంపై ఆశపడ్డాడు. దీంతో బత్తలపల్లి మండలం కట్టకిందపల్లి వద్దకు డబ్బు తీసుకుని రావాలని, బంగారం తీసుకుని వస్తున్నామని చెప్పారు. నిజమేనని నమ్మిన బాల చెన్నారెడ్డి 5 కేజీల బంగారు నాణాలు తీసుకుని రూ. 25 లక్షల రూపాయలు ముట్టజెప్పాడు. దీంతో దుండగులు నెమ్మదిగా అక్కడి నుంచి జారుకున్నారు. అనంతరం తాను మోసపోయానని గ్రహించిన బాల చెన్నారెడ్డి బత్తలపల్లి పోలీసులకు ఫిర్యాదు చేశారు.