ఈ మ్యాచ్‌కు భారీగా రేట్లు పెట్టినా యాడ్లు ఇస్తున్నారంట

దిశ, స్పోర్ట్స్: ఐసీసీ పురుషుల టీ20 వరల్డ్ కప్ ఒమన్, యూఏఈ వేదికగా అక్టోబర్ 10 నుంచి ప్రారంభం కానున్నది. తొలుత ఒమన్‌లో క్వాలిఫయింగ్ మ్యాచ్‌లు జరుగనుండగా.. ఆ తర్వాత యూఏఈలో సూపర్ 12 మ్యాచ్‌లు నిర్వహించనున్నారు. దాయాది దేశాలైన ఇండియా – పాకిస్థాన్ మధ్య ఈ నెల 24న దుబాయ్ వేదికగా లీగ్ మ్యాచ్ జరుగనున్నది. 2019 వన్డే వరల్డ్ కప్ తర్వాత ఇరు జట్లు ఇప్పటివరకు మరో మ్యాచ్ ఆడలేదు. దీంతో ఈ లీగ్ మ్యాచ్‌పై అందరి దృష్టి పడింది. ఇప్పటికే మ్యాచ్ టికెట్లు హాట్ కేకుల్లా అమ్ముడు పోయాయి. ఇక ఈ మ్యాచ్‌ క్రేజ్‌ను దృష్టిలో పెట్టుకొని స్టార్ స్పోర్ట్స్ భారీగా యాడ్ రేట్లు నిర్ణయించింది. సాధారణ మ్యాచ్‌ల సమయంలో 10 సెకెన్ల యాడ్ రూ. 12 లక్షల నుంచి రూ. 18 లక్షల వరకు ఉన్నది. అయితే ఇండియా – పాకిస్తాన్ మ్యాచ్‌కు మాత్రం 10 సెకెన్ల యాడ్ రేటు రూ. 25 లక్షల నుంచి రూ. 30 లక్షల వరకు నిర్ణయించింది. ఈ మ్యాచ్‌కు ఉండే ప్రాధాన్యత బట్టే భారీ రేట్లు ఫిక్స్ చేసినట్లు తెలుస్తున్నది. అయినా సరే ప్రకటనకర్తలు వెనక్కు తగ్గడం లేదు. భారీ రేట్లు పెట్టినా యాడ్లు కుమ్మరిస్తున్నారు.