మహిళ వన్డే క్రికెట్‌లో ఆస్ట్రేలియా రికార్డు

దిశ, స్పోర్ట్స్ : మహిళా వన్డే క్రికెట్‌లో ఆస్ట్రేలియా జట్టు సరికొత్త రికార్డు సృష్టించింది. ఆదివారం న్యూజీలాండ్‌తో మౌంట్ మాంగనూయ్‌లో జరిగిన మ్యాచ్‌లో విజయం సాధించడం ద్వారా అత్యధిక విజయాల రికార్డు సృష్టించింది. ఇది ఆస్ట్రేలియా మహిళా జట్టుకు 22వ విజయం. కాగా పురుషుల క్రికెట్‌లో ఆస్ట్రేలియా పురుషుల జట్టు వరుసగా 21విజయాలు సాధించిన రికార్డును తాజాగా మహిళల జట్టు అధిగమించడం విశేషం. 2017 అక్టోబర్‌లో ఆస్ట్రేలియా జట్టు చివరి సారిగా మ్యాచ్ ఓడిపోయింది.

ఆ తర్వాత వరుసగా ఇండియా, పాకిస్తాన్, న్యూజీలాండ్, వెస్టిండీస్, శ్రీలంకలపై వన్డే సిరీస్‌లను వైట్ వాష్ చేసింది. తాజాగా న్యూజీలాండ్‌పై జరిగిన తొలి వన్డేలో విజయం సాధించి సరికొత్త రికార్డు సృష్టించింది. వన్డే సిరీస్‌లో వరుస విజయాలు సాధించిన టాప్ 5 జట్లలో మూడు సార్లు అస్ట్రేలియా మహిళల జట్టే ఉండటం గమనార్హం. భారత జట్టు వరుసగా 16 వన్డేల్లో విజయాలు సాధించింది.