మనాలిలో ఘోరం : కారు రివర్స్ తీయమన్నందుకు ఖడ్గాలతో నరికి..

దిశ, వెబ్‌డెస్క్ : కొవిడ్ సెకండ్ వేవ్ ఉధృతి తగ్గుముఖం పట్టడంతో హిమాచల్ ప్రదేశ్ రాష్ట్రంలోని శీతల ప్రాంతం మనాలికి పర్యటకుల తాకిడి పెరిగింది. అక్కడి హోటళ్లు మొత్తం పర్యటకులతో నిండిపోయాయని, బెడ్స్ కూడా దొరకడం లేదని ఇటీవల హిమాచల్ టూరిజం డిపార్ట్‌మెంట్ ప్రకటించిన విషయం తెలిసిందే. అయితే, తాజాగా మనాలి పర్యటనకు వెళ్లిన నలుగురు వ్యక్తులు బీభత్సం సృష్టించారు. పంజాబ్‌కు చెందిన నలుగురు పర్యటకులు రహదారిపై అడ్డంగా నిలిపారు.

ట్రాఫిక్ సమస్య ఏర్పడుతోందని వెంటనే కారును రివర్స్ తీయాలని తోటి వాహనదారులు అనడంతో తమ వెంట తెచ్చుకున్న తల్వార్లు( ఖడ్గాలు) తీసి వారిపై దాడికి యత్నించారు.ఈ ఘటనలో ఒకరికి గాయమైనట్లు తెలుస్తోంది. సమాచారం అందుకున్న వెంటనే ఎస్పీ గురుదేశ్ శర్మ ఘటనా స్థలికి చేరుకుని ఆ నలుగురిని అదుపులోకి తీసుకున్నామని చెప్పారు. కత్తులతో వీరంగం సృష్టించిన వారిపై ఐపీసీ, ఆయుధ చట్టం సంబంధిత సెక్షన్ల కింద కేసు నమోదు చేసి దర్యాప్తు చేస్తున్నట్లు ఎస్పీ వెల్లడించారు.