ప్రజాస్వామిక హక్కులకై పెనుగులాట!

విద్యాలయాలు ఆధునిక దేవాలయాలు. వాటి అభివృద్ధికి, భావి తరాలకు నాణ్యమైన విద్య అందించేందుకు కృషి చేయాల్సిన పాలకులు సవతి తల్లి ప్రేమ చూపిస్తున్నారు. రాష్ట్రంలో ఎన్నో విద్యాలయాలు, విశ్వవిద్యాలయాలు ఉన్నా, ధిక్కార స్వరానికి ప్రతీకగా నిలిచిన విద్యాలయాల్లో ఉస్మానియాది అగ్రస్థానం. ఇప్పుడు ఉస్మానియాలో స్వేచ్ఛా వాయువులు పీల్చుకోలేని పరిస్థితికి నెట్టివేయాలనే ప్రయ త్నాలు ప్రారంభమయ్యాయి. యూనివర్సిటీలో భావప్రకటనా స్వేచ్ఛపై ఆంక్షలు విధిస్తూ ఉత్తర్వులు వెలువడిన నేపథ్యంలో యూనివర్సిటీలో నీలినీడలు కమ్ముకున్నాయి.

ఓయూ భూములు అన్యాక్రాంతం

ఉస్మానియా భూములు అన్యాక్రాంతమవుతూ వస్తున్నాయి. అగ్రికల్చర్ యూనివర్సిటీలో హైకోర్టుకు 100 ఎకరాలు కేటాయించారు. కాకతీయ యూనివర్సిటీ భూములు కబ్జాలకు గురవుతున్నాయి. కేంద్రీయ విశ్వవిద్యాలయానికి చెందిన వందల ఎకరాల భూములు అదానీకి అప్పగించే ఆలోచనలో అడుగులు పడుతున్నాయి. దీంతో యూనివర్సిటీలో విద్యార్థుల నిరసనలు వెలువెత్తుతున్నాయి. అందుకే ఓయూలో ఆంక్షలు పెడుతున్నారు. అనేక విద్యాలయాల్లో, కళాశాలలో నీళ్ల ట్యాంకులు, వివిధ కార్యాలయాలు నిర్మిస్తూ ఆక్రమిస్తున్నారు. ప్రభుత్వ విద్యారంగ అభివృద్ధిపై పూర్తి నిర్లక్ష్యం వహిస్తోంది. ప్రాథమిక, ఉన్నత పాఠశాల, కళాశాల, విశ్వవిద్యాలయాలలో మౌలిక వసతుల ఏర్పా టుకు కనిపించని ప్రణాళిక. తీవ్రమవుతున్న బోధన, బోధనేతర సిబ్బంది కొరత పరిష్కారానికై దృష్టి సారించని పరిస్థితి. బడ్జెట్‌లో విద్యా రంగానికి 15% నిధులు కేటాయించాలన్న డిమాండ్ పై పాలకుల హామీ లేదు.

చైతన్య, నారాయణకు అడ్డులేదు

ప్రైవేటు విద్యాలయాల ఏర్పాటుకు విచ్చలవిడిగా అనుమతులివ్వడంతో ప్రభుత్వ రంగంలోని విద్యాలయాలు దెబ్బతింటున్నాయి. తెలంగాణ ఉద్యమకాలంలో విద్యార్థులు తీవ్రంగా వ్యతిరేకించిన చైతన్య, నారాయణ విద్యా సంస్థలు మరింతగా విస్తరిస్తున్నాయి. ప్రైవేట్ విద్యా రంగంపై అజమాయిషి కరువైంది. వీటిల్లో వసతి సౌకర్యాలపై సరైన పర్యవేక్షణ లేదు. ఫీజులపై నియంత్రణ లేదు. ఇవేవీ పట్టింపు లేకుండా ఇంటిగ్రేటెడ్ పాఠశాలల ఏర్పాటు కోసం కోట్లాది రూపాయల వెచ్చింపుకై తొందరపాటు. మెడికల్ కళాశాలల్లో సౌకర్యాలు మెరుగుదలకు చేపడుతున్న చర్యలు నామ మాత్రమే. పాలనా పరంగా ఇలా ఉంటే ప్రజలకు ఉచిత విద్య, వైద్యం అందించడం ఎలా సాధ్యం..?

మళ్లీ ఉద్యమాలే శరణ్యం

కార్పొరేట్, ప్రైవేటు సంస్థలలో, విద్యాలయాల్లో, విశ్వ విద్యాలయాలలో ఏ మాత్రం రిజర్వేషన్లు వర్తించవు. ప్రైవేటు రంగాల్లో రిజర్వేషన్లు అమలు చేయనంత కాలం దళిత, గిరిజన, బహుజనులకు రిజర్వేషన్ల పెంపుతో ఒనగూరేది శూన్యం. జనాభా దామాషా ప్రకారం దళిత, బహుజన ఆదివాసీలకు రాజ్యాధికారంలో వాటా ఇవ్వకుండా తప్పించుకునేందుకే ఈ జిమ్మిక్కులు.. ప్రత్యేక రాష్ట్రంలో కూడా ప్రైవేటీకరణ, వనరుల దోపిడీ యదేచ్ఛగా సాగుతూనే ఉంది. అధికారంలో పాలకులు, పార్టీలు మారినంత మాత్రాన రాష్ట్ర ప్రజ లకు ప్రయోజనం కలగదు. ప్రజల జీవితాలలో మౌలిక మార్పుల సాధన కోసం తీసుకున్న చర్యలు కానరావు. రాష్ట్ర సాధన ఉద్యమంలో కీలక భూమిక వహించిన ఉద్యమ కారులకు, అసువులు బాసిన వారికి గుర్తింపు లేదు. ఎన్నికల వాగ్దానాలు ఎండమావులు అయ్యాయి. అసెంబ్లీ సాక్షిగా జర్నలిస్టులను హెచ్చరించడం సహేతుకం కాదు. తప్పుగా భావిస్తే సూచనలు చేయాలే తప్ప బెదిరించడం మంచి పద్ధతి కాదు. ప్రజాస్వామ్య వ్యవస్థ పరిరక్షణలో నాలుగో స్తంభంగా ప్రచారంలో ఉన్న మీడియాపై దాడి అప్రజాస్వామికం. తెలంగాణ పునర్నిర్మాణంలో ఉద్యమకారులకు పౌర సమాజం అండగా కదిలి నిలవాల్సి ఉంది. అధికారం దక్కించుకోవడం కోసమే రాజకీయ పార్టీలు వాగ్దానాల వరద పారిస్తాయనేది ఆచరణలో పలుమార్లు రుజువు అవుతోంది. పాలకుల హామీలు అమలుకు నోచుకోకపోతే, పౌర ప్రజాస్వామిక హక్కులు హరించే ప్రయత్నాలు మానుకోవాలి. లేని పక్షంలో పోరాటాల పురిటి గడ్డ తెలంగాణలో ఉద్యమాలు మళ్ళీ పురుడు పోసుకుంటాయి.

రమణా చారి

99898 63039