ఇక తెలంగాణలో ‘కేజ్రీవాల్’ రాజకీయం!

ఆమ్​ ఆద్మీ పార్టీ (ఆప్​) జాతీయ కన్వీనర్​, ఢిల్లీ ముఖ్యమంత్రి అరవింద్​ కేజ్రీవాల్​ త్వరలో హైదరాబాద్​కు రానున్నారు. వరుసగా మూడు సార్లు ఢిల్లీ పీఠాన్ని గెలిచి దేశ రాజకీయాల్లో సంచలనంగా మారిన ఆప్​ రాజకీయాలు ఇక తెలంగాణలో మొదలు కానున్నాయి. రాష్ర్టంలో పార్టీకి క్యాడర్​ ఉన్నప్పటికీ ఇప్పటిరకు ప్రజల్లోకి అంతగా వెళ్లలేదు. అయితే, ఢిల్లీ గెలుపు నేపథ్యంలో వచ్చే జీహెచ్​ఎంసీ ఎన్నికల్లో పోటీ చేయాలని, ప్రచారం కోసం కేజ్రీవాల్​ ను సైతం హైదరాబాద్​కు రప్పించాలని ఆ పార్టీ నిర్ణయిచింది. జీహెచ్​ఎంసీ ఎన్నికలతో పాటు తెలంగాణలో పార్టీని బలోపేతం చేయాలని స్థానిక నాయకులు కేజ్రీవాల్​ను కోరారు. ఆప్​ తెలంగాణ రాష్ట్ర బాధ్యులు ప్రియాంక కక్కర్​, రాష్ర్ట కన్వీనర్​ రాము గౌడ్​, జాయింట్​ సెక్రటరీ రషీద్ ఉల్​ హక్​లు ​ఫిబ్రవరి 17న రాత్రి ఢిల్లీలో కేజ్రీవాల్​ను కలిశారు. జీహెచ్​ఎంసీ ఎన్నికల ప్రచారంలో పాల్గొనాలని కేజ్రీవాల్​ను కోరారు. నగరంలో వివిధ ప్రాంతాల్లోని సమస్యలను గుర్తించి ప్రభుత్వం దృష్టికి తీసుకెళ్లి పరిష్కరించాలని ఈ సందర్భంగా ఆ నాయకులకు కేజ్రీవాల్​కు సూచించారు. ఇందుకోసం స్థానికంగా ఉండే అసోసియేషన్లు, సంస్థలు, వ్యక్తులను భాగస్వాములు చేయాలన్నారు. ముందుగా స్థానికుల్లో పార్టీపై నమ్మకం కలిగించడం ద్వారా విజయం సాధించడం సాధ్యమవుతుందన్నారు.

ప్రణాళికబద్ధంగా ఎన్నికలకు..

కేజ్రీవాల్​ ఆదేశాల ప్రకారం.. ఆప్​ నాయకత్వం ప్రణాళికబద్ధంగా జీహెచ్​ఎంసీ ఎన్నికలకు సిద్ధమవుతోంది. గ్రేటర్​లోని 150 వార్డులకు బాధ్యులను నియమించి ఎలక్షన్ల బాధ్యతలను అప్పగించనున్నట్టు పార్టీ రాష్ర్ట నాయకులు తెలిపారు. స్థానికంగా ఉండే విద్యాసంస్థలు, ఆస్పత్రులను పార్టీ క్యాడర్​ పరిశీలించి సమస్యలను గుర్తిస్తుంది. వార్డుల్లో ప్రజలకు ఎదురవుతున్న సమస్యలపై పోరాటం చేయడం, ప్రభుత్వ అధికారుల దృష్టికి తీసుకెళ్లేందుకు సిద్ధమవుతున్నారు. తద్వారా ఆప్​ ను ప్రజలు విశ్వసించేలా చేయడమే ఢిల్లీ ముఖ్యమంత్రి చేసిన సూచనల్లో ముఖ్యమైనది. పార్టీ సభ్యత్వాల నమోదు కోసం ఈ నెల 23న ప్రత్యేక క్యాంపు​ను కూడా ఆప్​ చేపట్టనుంది. ఇందుకోసం ప్రత్యేకంగా మొబైల్​ నెంబర్​ కేటాయించి ‘ జాయిన్​ రివల్యూషన్​ – జాయిన్​ ఆప్​’ నినాదంతో మిస్​ కాల్​ ప్రోగ్రాం చేపట్టనున్నారు.