రోడ్డు ప్రమాదంలో మహిళ మృతి… బాలుడు పరిస్థితి విషమం

దిశ,ఇబ్రహీంపట్నం : ఇబ్రహీంపట్నం మండల పరిధిలోని మంగల్‌పల్లి ఎక్స్‌ రోడ్డు వద్ద సోమవారం ఘోర రోడ్డు ప్రమాదం జరిగింది. బి ఎన్ రెడ్డి నంది హిల్స్ లో ఉండే పోలేపాక సాయిలు తన భార్య, కొడుకు బండిమీద కురుమిద్ద గ్రామానికి బంధువుల పెళ్ళికి వెళ్తున్నారు. మార్గమధ్యంలో మంగల్‌పల్లి ఎక్స్‌ రోడ్డుకు చేరుకోగా కళ్లద్దాలు కొనేందుకు రోడ్డుకు ఎడమవైపు బైక్‌ను ఆపాడు. ఇంతలో మారుతీ సుజుకి సెలెరియో కార్ నంబర్ TS07FL2407 ఇబ్రహీంపట్నం వైపు వెళుతోంది. కారు డ్రైవర్ నిర్లక్ష్యంగా వాహనం నడిపి ఆగివున్న బైక్‌ను వెనుక నుండి ఢీకొట్టడంతో అతని భార్య పోలెపాక రాములమ్మ (35) అక్కడికక్కడే మృతి చెందింది. అతని కుమారుడు పోలేపాక అరుణ్ కుమార్ వయస్సు 14 సంవత్సరాలు గల వ్యక్తికి గాయాలయ్యాయి. అతని పరిస్థితి విషమంగా ఉందని వైద్యులు ఉస్మానియా ఆసుపత్రికి తరలించారు. సాయిలు పరిస్థితి నిలకడగా ఉందని వైద్యులు వెల్లడించారు. నిందితుడు నాగోల్ కు చెందిన సుధాకర్ ప్రస్తుతం పోలీస్ కస్టడీలో ఉన్నాడు. అలాగే రాములమ్మ మృతదేహాన్ని ఇబ్రహీంపట్నం మార్చురీకి తరలించారు.