Theft : పోలీస్ కానిస్టేబుల్ ఇంట్లో చోరీ..

దిశ, పెద్దశంకరంపేట: పెద్దశంకరంపేట లోని వెంకటేశ్వర కాలనీలో నివాసం ఉంటున్న పోలీస్ కానిస్టేబుల్  (Police Constable ) దంతెల సీమాన్ ఇంట్లో గుర్తు తెలియని దుండగులు దొంగతనానికి పాల్పడ్డారు. ఎనిమిదిన్నర తులాల బంగారం,30 తులాల వెండి.. రూ.15వేల నగదు దొంగిలించిన సంఘటన మంగళవారం చోటుచేసుకుంది.. దంతెల సీమాన్ అల్లాదుర్గం పోలీస్ స్టేషన్ లో కానిస్టేబుల్ గా విధులు నిర్వహిస్తూ పెద్ద శంకరంపేట లో నివాసం ఉంటున్నాడు. పేట ఎస్సై తెలిపిన వివరాల ప్రకారం దంతెన సీమాన్ సోమవారం ఉదయం 9 గంటలకు ఇంటికి తాళం వేసి బయటకు వెళ్లిన అనంతరం ఈరోజు ఉదయం 11 గంటల సమయంలో ఇంటికి రాగా ఇంటి ముందు ఉన్న తలుపులు వేసిన వేసినట్లుగానే ఉన్నాయన్నారు.

లోపల ఉన్న తలుపు తాళం పగులగొట్టి ఇంట్లోని బెడ్ రూమ్ లోని బీరువా మొత్తం పగలగొట్టి అందులో ఉన్న బట్టలు చిందరవందరగా పడేయడం తో పాటు మూడు తులాల బంగారు నాను, మూడు తులాల పుస్తెలతాడు, ఒక తులం బుట్ట కమ్మలు, అర తులం బంగారు కమ్మలు, 30 తులాల వెండి వస్తువులు, వీటితోపాటు రూ.15వేల నగదు దొంగలు దొంగిలించినట్లు ఆయన వివరించారు. సంఘటన స్థలాన్ని అల్లాదుర్గం సీఐ రేణుక రెడ్డి, పేట ఎస్ఐ శంకర్, పోలీసులు పరిశీలించి వివరాలు సేకరిస్తున్నారు. బాధితుడు సీమాన్ దరఖాస్తు మేరకు కేసు నమోదు చేసి దర్యాప్తు చేస్తున్నట్లు ఎస్సై తెలిపారు.