ఆలయ వేడుకలో తీవ్ర విషాదం.. నలుగురు దుర్మరణం

దిశ, వెబ్‌డెస్క్: తమిళనాడులోని అరక్కోణంలో తీవ్ర విషాదం చోటుచేసుకుంది. ఆలయ వేడుకల్లో భాగంగా నిర్వహించిన అమ్మవారి ఊరేగింపులో ఆదివారం రాత్రి క్రేన్ కూలి నలుగురు భక్తులు అక్కడికక్కడే దుర్మరణం చెందారు. మరో పదిమంది భక్తులకు తీవ్ర గాయాలు అయ్యాయి. దీంతో వెంటనే అప్రమత్తమైన ఆలయ సిబ్బంది సహాయక చర్యలు చేపట్టారు. క్షతగాత్రులను ఆసుపత్రికి తరలించారు. విషయం తెలుసుకున్న పోలీసులు ఘటనా స్థలానికి చేరుకొని కేసు నమోదు చేసుకుని దర్యాప్తు ప్రారంభించారు. ప్రమాదానికి సంబంధించిన పూర్తి వివరాలు తెలియాల్సి ఉంది. కాగా, ఈ ఉత్సవాల్లో చుట్టుపక్కల గ్రామాల నుంచి 1500 మందికి పైగా భక్తులు హాజరయ్యారు. నెమిలి నుంచి దాదాపు 50 మంది పోలీసులను కూడా మోహరించారు.