ఆటో బోల్తాపడి మహిళా కూలీ మృతి..

దిశ, ఆదిలాబాద్ : ఆదిలాబాద్ పట్టణ శివారులోని బంగారు గూడ సమీపంలో ఆటో బోల్తా పడి ఒక మహిళ మృతి చెందిన సంఘటన గురువారం చోటు చేసుకుంది. స్థానికులు తెలిపిన వివరాల ప్రకారం బంగారిగూడకు చెందిన పలువురు మహిళలు ఆటోలో సమీపంలోని పంట పొలానికి పత్తి ఏరడానికి బయలుదేరారని పేర్కొన్నారు. ఈ క్రమంలో ఆటో వెళ్తుండగా ముందు టైర్ పంచర్ అయి ప్రమాదవశాత్తు డంపింగ్ యార్డ్ వద్ద మొరం కోసం తవ్విన గుంతలో ఆటో పడిపోయిందని తెలిపారు.

ఈ ప్రమాదంలో బంగారు గూడ కాలానికి చెందిన సవిత అనే మహిళ అక్కడికక్కడే మృతి చెందగా మరో ముగ్గురు మహిళా కూలీలు తీవ్రంగా గాయపడ్డారు. ఈ విషయం తెలుసుకున్న రూరల్ పోలీసులు సంఘటన స్థలానికి చేరుకుని పరిశీలించారు. అనంతరం వీరిని చికిత్స నిమిత్తం రిమ్స్‌కు తరలించినట్లు ఎస్ఐ ముజాహిద్ వెల్లడించారు. మృతదేహాన్ని పోస్టుమార్టం నిమిత్తం మార్చురీకి తరలించి దర్యాప్తు చేస్తామని వెల్లడించారు.