రోడ్డు ప్రమాదంలో డిప్లొమా విద్యార్థిని మృతి

దిశ,చైతన్య పురి : కళాశాలకు వెళ్లే క్రమంలో రోడ్డు దాటుతున్న విద్యార్థిని మోటార్ సైకిల్ ఢీకొట్టడంతో అక్కడికక్కడే మృతి చెందింది. ఆ సంఘటన సరూర్ నగర్ పోలీస్ స్టేషన్ పరిధిలో బుధవారం ఉదయం చోటు చేసుకుంది. సీఐ సైదిరెడ్డి తెలిపిన వివరాల ప్రకారం నాగర్ కర్నూల్ జిల్లా బల్మూర్ మండలం పోలేపల్లి గ్రామానికి చెందిన గుబ్బల లోకేష్ తన కుటుంబంతో కలిసి కర్మన్ ఘాట్ లోని న్యూ మారుతి నగర్ లో నివాసముంటున్నాడు.

తన చిన్న కుమార్తె గుబ్బల త్రిష (20) నాదర్ గుల్ లోని ఎంవిఎస్ఆర్ కళాశాలలో డిప్లమా మూడవ సంవత్సరం చదువుతుంది. రోజు మాదిరిగానే బుధవారం ఉదయం కళాశాలకు బయలుదేరింది. ఈ క్రమంలో మంద మల్లమ్మ చౌరస్తా వద్ద రోడ్డు దాటుతుండగా రాయల్ ఎన్‌ఫీల్డ్ బైక్‌ను నడుపుతున్న ఒక వ్యక్తి వెనకాల అజాగ్రత్తగా నిర్లక్ష్యంగా నడుపుతూ త్రిషను కొట్టాడు. దీంతో ఆమె కిందపడింది. అదే దారిలో వస్తున్న ఓ కారు అకస్మాత్తుగా ఆమెపై నుండి వెళ్లడంతో అక్కడికక్కడే మృతి చెందింది. చుట్టుపక్కల వారు గమనించి ఫోన్‌ ద్వారా కుటుంబసభ్యులకు సమాచారం అందించారు. ఈ మేరకు మృతురాలి తండ్రి లోకేష్ ఫిర్యాదు మేరకు కేసు నమోదు చేసుకుని దర్యాప్తు చేస్తున్నట్లు ఆయన తెలిపారు.