కారును ఢీకొట్టిన కోళ్ల బొలెరో వాహనం..వ్యక్తి మృతి

దిశ,కందుకూరు(మహేశ్వరం): ఎదురెదురుగా రెండు వాహనాలు ఢీకొని ఓ వ్యక్తి అక్కడికక్కడే మృతి చెందాడు.ఈ సంఘటన ఆదివారం రాత్రి 11 గంటల సమయంలో కందుకూరు పోలీస్ స్టేషన్ పరిధిలోని శ్రీశైలం జాతీయ రహదారి కొత్తగూడ గేటు సమీపంలో ఎమ్ ఆర్ఆర్ రెస్టారెంట్ వద్ద జరిగింది. కందుకూరు సీఐ సీతారాం తెలిపిన వివరాల ప్రకారం... రంగారెడ్డి జిల్లా కడ్తాల్ మండలం గోవింద పల్లి గ్రామానికి చెందిన కంబాలపల్లి మల్లేష్ (34)ఆదివారం రాత్రి 11 గంటల సమయంలో తన కారు (టీఎస్ 06 యూబీ 6731) లో కడ్తాల్ నుంచి హైదరాబాద్ వెళ్తున్నాడు.

మార్గమధ్యలో శ్రీశైలం జాతీయ రహదారి కొత్తగూడ గేట్ సమీపంలో ఎమ్ ఆర్ ఆర్ రెస్టారెంట్ వద్దకు రాగానే ఎదురుగా వస్తున్న కోళ్ల బండి బొలెరో వాహనం(టీజీ 07 టి 6778) నడుపుతున్న వ్యక్తి షేక్ పాషా (28) అజాగ్రత్తగా వాహనాన్ని నడుపుతూ ఎదురుగా వస్తున్న కంబాలపల్లి మల్లేష్ కారును ఢీ కొట్టాడు.దీంతో కంబాలపల్లి మల్లేష్ అక్కడికక్కడే మృతి చెందాడు.మృతుని కుటుంబ సభ్యుల ఫిర్యాదు మేరకు పోలీసులు కేసు నమోదు చేసుకొని దర్యాప్తు చేపట్టారు.మృతదేహాన్ని పోస్టుమార్టం నిమిత్తం ఉస్మానియా ఆసుపత్రికి తరలించారు.