పెనుమార్పు.. బీజేపీలో చేరుతున్న కాంగ్రెస్ లీడర్

దిశ ప్రతినిధి, ఆదిలాబాద్: నిర్మల్ జిల్లా కేంద్ర పురపాలక సంఘం మాజీ చైర్మన్ అప్పాల గణేష్ చక్రవర్తి బీజేపీలో చేరుతున్నారు. మరికాసేపట్లో హైదరాబాదులోని పార్టీ కార్యాలయంలో బీజేపీ రాష్ట్ర అధ్యక్షుడు బండి సంజయ్ సమక్షంలో కండువా కప్పుకోనున్నారు. ఈ నేపథ్యంలోనే అప్పాల గణేష్ తన ముఖ్య అనుచరులతో హైదరాబాద్ చేరుకున్నారు. గతంలో మంత్రి అల్లోల ఇంద్రకరణ్ రెడ్డికి అత్యంత సన్నిహితుడిగా గణేష్‌కు పేరు ఉంది. అయితే, గత అసెంబ్లీ ఎన్నికల సమయంలో ఆయన కాంగ్రెస్‌లో చేరారు. బలమైన సామాజిక వర్గంగా పేరున్న మున్నూరు కాపు‌ వర్గానికి గణేష్ చెందినప్పటికీ మాజీ ఎమ్మెల్యే ఏలేటి మహేశ్వర రెడ్డి సఖ్యత కుదరలేదని రాజకీయ విశ్లేషకులు చెబుతున్నారు. ఇక ఈ పరిణామాల నేపథ్యంలోనే ఆయన బీజేపీలో చేరుతున్నట్టు సమాచారం. అప్పాల గణేష్ బీజేపీలో చేరికతో నియోజకవర్గ రాజకీయాల్లో పెను మార్పులు సంభవించే అవకాశం ఉందన్న అభిప్రాయాలు వ్యక్తమవుతున్నాయి.