అభిమానుల మనసుల్లో ఎప్పటికీ కృష్ణ సూపర్ స్టారే : సినీ నటుడు

దిశ, రవీంద్రభారతి : అభిమానుల మనసుల్లో ఎప్పటికీ కృష్ణ 'సూపర్ స్టారే' అని.. ఆయన నుంచి ఎన్నో విషయాలు నేర్చుకున్నానని ప్రముఖ సినీ నటుడు సుధీర్ బాబు తెలిపారు. సూపర్ స్టార్ మహేష్ కృష్ణసేన ఆధ్వర్యంలో పద్మభూషణ్ సూపర్ స్టార్ కృష్ణ రెండవ వర్ధంతి వేడుకలు గురువారం రవీంద్రభారతిలో ఘనంగా నిర్వహించారు. ఈ కార్యక్రమానికి ముఖ్య అతిథులుగా ప్రముఖ సినీ నటుడు సుధీర్ బాబు, విశ్రాంత ఐఏఎస్ అధికారి కేవీ రమణాచారి, ప్రముఖ దర్శకులు తమ్మారెడ్డి భరద్వాజ, ముప్పలేని శివ లు హాజరై పద్మభూషణ్

సూపర్ స్టార్ కృష్ణ చిత్రపటానికి పూలమాలవేసి నివాళులు అర్పించారు. ఈ సందర్భంగా సినీ నటుడు సుధీర్ బాబు మాట్లాడుతూ.. జయ అపజయాలతో సంబంధం లేకుండా ఎన్నో చిత్రాలు నటించారని.. తెలుగు ప్రేక్షకులకు మొదటిసారి హాలీవుడ్ చిత్రాల్లోని పాత్రలను పరిచయం చేసింది సూపర్ స్టార్ కృష్ణ అని కొనియాడారు. తమ్మారెడ్డి భరద్వాజ మాట్లాడుతూ… టాలీవుడ్ ఎవర్ గ్రీన్ హీరోలలో సూపర్ స్టార్ కృష్ణ ఒకరుని.. ఎన్నో సూపర్ హిట్ చిత్రాల్లో నటించి.. తెలుగు ప్రేక్షకుల మనసులలో ప్రత్యేకమైన స్థానాన్ని ఏర్పర్చుకున్నారని ఆయన అన్నారు. ఈ కార్యక్రమంలో సూపర్ స్టార్ మహేష్ కృష్ణసేన అధ్యక్షులు పీ.మల్లేష్, ప్రధాన కార్యదర్శి రాందాస్ శ్రీధర్ బాబు, కోశాధికారి గంటీ సాయిజీ రావు, కృష్ణ అభిమానులు పాల్గొన్నారు.