ఆ సినిమాలో నటించడం నా అదృష్టం : చిరంజీవి

దిశ, వెబ్ డెస్క్: చిరంజీవి కెరీర్ లో ఓ మరుపురాని చిత్రంగా ‘జగదేక వీరుడు అతిలోక సుందరి’ తప్పక నిలుస్తుంది. దర్శకేంద్రుడి అత్యద్భుతమైన చిత్రాల్లో ఇదీ ఒకటి. వైజయంతీ బ్యానర్ లో నిర్మితమైన సినిమాల్లో ఓ ఆణిముత్యంలా ఈ చిత్రం నిలిచిపోతోంది. ఇలా ఈ చిత్రంతో చాలా మందికి అనుబంధముంది. వారందరికీ చిరంజీవి శుభాభివందనాలు తెలియజేశారు. 1990లో విడుదలైన ఈ చిత్రం 2020, మే9తో 3 దశాబ్దాలను పూర్తి చేసుకుంటుంది. ఈ సందర్భంగా జగదేక వీరుడు, అతిలోక సుందరి సినిమాకు సంబంధించిన మూడు ఆసక్తికరమైన విషయాలను నాని వాయిస్ ఓవర్ తో మూడు రోజుల పాటు విడుదల చేయనున్నట్లు ఇటీవల చిత్ర నిర్మాణ సంస్థ వైజయంతీ మూవీస్ ప్రకటించిన విషయం మనందరికీ తెలిసిందే. తాజాగా చిరంజీవి కూడా ఈ సినిమా కోసం ఓ ప్రత్యేక వీడియో ను షేర్ చేశారు.

‘జగదేకవీరుడు అతిలోకసుందరి సినిమా రిలీజై మే 9తో 30 ఏళ్లు పూర్తి చేసుకుంటున్న సందర్భంగా ఈ చిత్రంతో అనుబంధం ఉన్న ప్రతి ఒక్కరికి నా హృదయపూర్వక శుభాభినందనలు తెలియజేస్తున్నాను. అద్భుతాన్ని మనం ప్లాన్ చేయలేం. అది అలా జరిగిపోతుందంతే. 'జగదేక వీరుడు అతిలోక సుందరి' సమష్టి కృషి ఫలితమని చెప్పడానికే ఇదే సరైన ఉదాహరణ. ఈ విజయంలో అందరికీ భాగం ఉంది. తమ ప్రతిభతో ఈ చిత్రాన్ని గొప్ప క్లాసిక్ గా మలిచారు. ఈ సినిమాకు జనరేషన్ గ్యాప్ లేదు. ఇది టైమ్ లెస్ మూవీ. తెలుగు చిత్ర పరిశ్రమలోని టాప్ 25 చిత్రాల్లో ఈ సినిమాకు తప్పకుండా ఓ చోటు ఉంటుంది. ఇలాంటి గొప్పి సినిమాలో నటించే అవకాశం దొరికినందుకు ఎంతో అదృష్టంగా భావిస్తున్నాను. ఎంతో గర్వపడుతున్నాను’ అని మెగాస్టార్ ట్విట్టర్ వేదికగా తెలిపారు.

tags: chiranjeevi, megastar, jagadeka veerudu athiloka sundari