Divya Tyagi: వందేళ్ల ప్రశ్నకు సమాధానం.. ఈ అమ్మాయి బుర్ర మాములుగా లేదుగా!

దిశ, వెబ్ డెస్క్: గణిత శాస్త్రంలో గత వందేళ్లుగా ఓ ప్రశ్న పరిష్కారం లేకుండా ఉండిపోయింది. పెద్ద పెద్ద శాస్త్రవేత్తలు సైతం దాన్ని సాల్వ్ చేసేందుకు ప్రయత్నించి విఫలయ్యారు. కానీ, తాజాగా భారత సంతతికి చెందిన ఓ అమ్మాయి ఆ ప్రశ్నను పరిష్కారించి.. బ్రిలియంట్‌ లేడీ అనిపించుకుంది. మరీ వందేళ్లుగా సాల్వ్ కానీ ఆ మ్యాథ్స్ ప్రాబ్లమ్ ఏంటి? సాల్వ్ చేసిన అమ్మాయి ఎవరు? ఇక్కడ తెలుసుకుందాం.

భారత సంతతికి చెందిన దివ్య త్యాగి (Divya tyagi) అనే అమ్మాయి అమెరికాలోని పెన్సిల్వేనియా విశ్వవిద్యాలయంలో ఏరోస్పేస్‌ ఇంజినీరింగ్‌లో మాస్టర్స్‌ చదువుతుంది. ఓ వైపు చదువు కొనసాగిస్తునే మరోవైపు ఆయా అంశాలపై పరిశోధనలూ నిర్వహిస్తోంది. ఈ క్రమంలోనే 'కంప్యుటేషనల్‌ ఫ్లూయిడ్‌ డైనమిక్స్‌ (CFD)'లో కటింగ్‌ ఎడ్జ్‌ సాంకేతికతతో పలు ప్రయోగాలు చేస్తోంది.

అయితే, పవన విద్యుత్‌ రంగంలో ఉపయోగించే గాలి మరల అంశంపై బ్రిటిష్‌ శాస్త్రవేత్త హెర్మన్‌ గ్లాయెర్ట్‌ (Hermann Glauert) 1926లో పలు పరిశోధనలు చేశారు. ఈ క్రమంలోనే ఆయన ఓ నమూనాను సైతం రూపొందించారు. అయితే, గాలి ప్రెషర్​ వల్ల టర్బైన్ రోటర్‌పై ఎలాంటి ప్రభావం పడుతుంది? ఈ ఒత్తిడి వల్ల గాలి మరల బ్లేడ్‌లు ఎలా వంగి ఉంటాయి? వంటి కీలకమైన అంశాలకు పరిష్కారం చూపకుండానే వదిలేశారు. ఈ సమస్య పరిష్కారానికై గత వందేళ్లుగా ఎంతో మంది హేమాహేమీలు ప్రయత్నిస్తునే ఉన్నారు.

ఈ నేపథ్యంలోనే దివ్యకు గైడ్‌గా ఉన్న ప్రొఫెసర్‌ స్వెన్‌ ష్క్మిట్జ్‌ (Sven Schmitz) గాలి మరల మన్నికను పెంచే అంశంపైన పరిశోధన చేస్తున్నారు. ఈ క్రమంలో కలన గణితానికి సంబంధించిన ఈ సమస్యను పరిష్కరించమని తన విద్యార్థుల్లో నలుగురికి సూచించారు. అందులో దివ్య త్యాగి కూడా ఒకరు. ఇక విమానయాన రంగంలో తన పరిశోధనల్ని కొనసాగిస్తూనే వారంలో 10-15 గంటల అదనపు సమయాన్ని దివ్య ఈ గణిత సమస్య పరిష్కారానికి కేటాయించేది. చివరకు ఈ వందేళ్లుగా అపరిష్కృతంగా ఉన్న ప్రశ్నకు ఫార్ములా కనుక్కోవడంలో సఫలీకృతమైంది. అంతేకాదు, దివ్య చేసిన పరిశోధనలు గాలి మరల రూపకల్పనలో కొత్త మార్గాలకు తెరతీసినట్లయింది.

ఈ పరిశోధనకు సంబంధించిన థీసిస్‌ 'విండ్‌ ఎనర్జీ సైన్స్‌' అనే జర్నల్‌లో ప్రచురితమైంది. 'బెస్ట్​ ఏరోస్పేస్‌ ఇంజినీరింగ్‌' థీసిస్‌గానూ ఘనత సాధించింది. అలాగే, దివ్య చేసిన పరిశోధనకు గుర్తింపుగా 'Anthony E. Wolk Award' కూడా దక్కింది. దివ్య చేసిన పరిశోధన, ఆమె ప్రతిభను పెన్సిల్వేనియా యూనివర్సిటీ కొనియాడింది. ఈ పరిశోధనను అటు అమెరికా వ్యాప్తంగా, ఇటు ప్రపంచవ్యాప్తంగా పాఠ్యాంశాల్లో చేర్చితే బాగుంటుందని వర్సిటీ సూచిస్తోంది.