కొన్ని గంటల్లో పెళ్లి… వధువు హత్య

దిశ, వెబ్‌డెస్క్: పెళ్లి వేడుకలతో ఆ ఇల్లు కళకళలాడుతోంది. కొవిడ్ నిబంధనలతో బంధువులు జాగ్రత్తలతో పనుల్లో నిమగ్నై పోయారు. మెడలో మూడు ముళ్లు వేసుకొని అత్తగారింట్లో అడుగు పెట్టేందుకు యువతి సైతం ఉవ్విళ్లూరుతోంది. కొద్ది గంటల్లో ముహూర్తం ఉండగా పెళ్లి పీటలెక్కేందుకు యువతి రెడీ అయిపోయింది. అటు ఇరువురు కుటుంబ సభ్యులు సైతం పెళ్లి సంబరాల్లో మునిగి తేలుతున్నారు. కానీ వారికి ఆ ఆనందం ఎంతసేపు నిలవలేదు. పెళ్లి బజాలు మోగాల్సిన ఇంట్లో చావు డప్పులు మోగాయి. కొన్నిగంటల్లో లగ్గం మీద కూర్చోవాల్సిన యువతే హత్యకు గురికావడంతో కుటుంబ సభ్యులు, బంధువులు పుట్టెడు దుఖంలో మునిగిపోయారు. మధ్యప్రదేశ్‌లో జరిగిన ఘటనకు సంబంధించి వివరాలు ఇలా ఉన్నాయి.

రాట్లాం జిల్లాలోని జోరా పట్టణానికి చెందిన సోనూ అనే యువతికి మూడేళ్ల క్రితం ఓ ఫంక్షన్‌లో రామ్‌యాదవ్ అనే యువకుడు పరిచయం అయ్యాడు. కొద్దిరోజుల వరకు మంచి ఫ్రెండ్స్‌గా కొనసాగిన వీరి మధ్య ప్రేమ చిగురించింది. కొన్నాళ్లకే విభేదాలు రావడంతో సోనూ.. ఆ యువకుడిని దూరం పెట్టింది. అప్పటి నుంచి ఆ యువతిపై రామ్‌యాదవ్ కోపం పెంచుకున్నాడు. ఇదే క్రమంలో సోనూకు కుటుంబ సభ్యులు మరో యువకుడితో పెళ్లి సంబంధం ఖాయం చేయగా ఈనెల 4న శనివారం సాయంత్రం ముహూర్తం ఉంది. దీంతో బ్రైడల్ మేకప్ కోసం తన సోదరితో కలిసి బ్యూటీ పార్లర్‌కు సోనూ వెళ్లింది. అప్పటికే చాలాసార్లు రామ్‌యాదవ్‌.. సోనూకు ఫోన్ చేస్తున్నా ఆమె లిప్ట్ చేయడం లేదు.

బ్రైడల్ మేకప్ కోసం సోనూ బ్యూటీ పార్లర్‌కు వెళ్లిందన్న విషయం తెలుసుకున్న రామ్‌యాదవ్… అతని ఫ్రెండ్ పవన్ ఫోన్ నుంచి కాల్ చేయడంతో ఆమె లిప్ట్ చేసింది. వెంటనే అతని బైక్‌పై బ్యూటీ పార్లర్‌కు వెళ్లిన రామ్‌యాదవ్.. సోనూను పదనైన కత్తితో పొడిచాడు. చనిపోయిందని నిర్దారించుకున్న తర్వాత తన ఫ్రెండ్ బైక్‌పై దాదాపు 30 కిలోమీటర్ల వరకు వెళ్లి.. అక్కడి నుంచి రాజస్థాన్ పారిపోయాడు. సీసీ పుటేజ్ ద్వారా పోలీసులు దర్యాప్తు చేపట్టి పవన్‌ను అదుపులోకి తీసుకొని విచారించడంతో జరిగిన విషయం మొత్తం చెప్పాడు. నిందితుడి కోసం ముమ్మరంగా పోలీసులు గాలిస్తున్నారు.