Tirumala: శ్రీవారి సన్నిథిలో నటి సుమలత.. ఎన్నికల ఫలితాలపై ఆసక్తికర వ్యాఖ్యలు

దిశ, వెబ్‌డెస్క్: అలనాటి తెలుగు హీరోయిన్ సుమలత సోమవారం వీఐపీ బ్రేక్ దర్శనంలో భాగంగా స్వామి వారిని దర్శించుకున్నారు. అదేవిధంగా ఆమెతో పాటు కొడుకు, కోడలు కూడా ఆలయానికి వచ్చారు. స్వామి దర్శనం పూర్తి అయిన వెంటనే బయటకు వచ్చిన సుమలతను కర్ణాట పార్లమెంట్ ఎన్నికల ఫలితాలు ఎలా ఉండబోతున్నాయని ప్రశ్నించారు. ఈ సందర్భంగా ఆమె మాట్లాడుతూ.. కచ్చితంగా బీజేపీ కేంద్రంలో తిరుగులేని విజయం సాధిస్తుందని జోస్యం చెప్పారు. ఇప్పటికే అన్ని ఎగ్జిట్ పోల్స్‌కు కూడా కమలం పార్టీవైపు మొగ్గు చూపాయని గుర్తు చేశారు. మోడీ 3.0 పాలనను ప్రజలు చూడబోతున్నారని పేర్కొన్నారు. కర్ణాటకలోని మాండ్యా సీటును జేడీఎస్‌కు త్యాగం చేసినందుకు గాను పరిషత్‌కు పంపాలని బీజేపీ భావిస్తోందా అని ప్రశ్నించగా.. అవన్నీ మీడియాలో వచ్చే రూమర్లే అని కొట్టిపడేశారు. ప్రస్తుతానికి తాన స్టేట్ పాలిటిక్స్ వైపు చూడట్లేదని అన్నారు. రాజ్యసభ సీటును మీరేమైనా ఆశిస్తున్నారా అని ప్రశ్నించగా.. చూద్దాం పార్టీ ఏమని ఆదేశిస్తే దానికి కట్టుబడి ఉంటానని తెలిపారు. ఏపీ ఎన్నికల ఫలితాలపై ఎలా ఉండబోతున్నాయని అడగ్గా.. అది మీరే చెప్పాలంటూ సుమలత ప్రశ్నను దాట వేశారు.