టీడీపీ పొలిట్ బ్యూరో సభ్యులు అయ్యన్నపాత్రుడు అరెస్ట్

దిశ, డైనమిక్ బ్యూరో : మాజీమంత్రి, తెలుగుదేశం పార్టీ పొలిట్ బ్యూరో సభ్యులు చింతకాయల అయ్యన్నపాత్రుడిని పోలీసులు అరెస్ట్ చేశారు. విశాఖపట్నం విమానాశ్రయంలో పోలీసులు చింతకాయల అయ్యన్నపాత్రుడుని అరెస్ట్ చేసినట్లు తెలుస్తోంది. అయ్యన్నపాత్రుడిపై ఇప్పటికే పలు కేసులు నమోదు అయ్యాయి. ఇటీవల కృష్ణా జిల్లా గన్నవరంలో జరిగిన నారా లోకేశ్ యువగళం బహిరంగ సభలో అయ్యన్నపాత్రుడు మాట్లాడారు. ముఖ్యమంత్రి వైఎస్ జగన్ దగ్గర నుంచి పర్యాటక శాఖ మంత్రి ఆర్‌కే రోజా, మంత్రులు అంబటి రాంబాబు, మాజీమంత్రులు కొడాలి నాని, పేర్ని నాని, అనిల్ కుమార్ యాదవ్‌లపై తీవ్ర స్థాయిలో విరుచుకుపడ్డారు. అయితే మంత్రి ఆర్‌కే రోజాపై టూరిజం అభివృద్ధి చేయి రోజా అని అడిగితే నా సొగసు చూడు మాయా అంటుంది అంటూ అయ్యన్నపాత్రడు ధ్వజమెత్తారు. ఈ విమర్శలపై మాజీమంత్రి పేర్ని నానితోపాటు ఇతర నేతలు ఫిర్యాదు చేశారు. ముఖ్యమంత్రి వైఎస్ జగన్, మంత్రి ఆర్‌కే రోజాలపై అనుచిత వ్యాఖ్యలు చేశారంటూ అయ్యన్నపై 153 A, 354 A1(4), 504, 505(2), 509 ఐపీఎస్ సెక్షన్ల కింద కేసు నమోదు అయ్యాయి. అయితే శుక్రవారం ఢిల్లీ నుంచి అయ్యన్నపాత్రుడు విశాఖపట్నం ఎయిర్ పోర్టుకు చేరుకున్నారు. అప్పటికే అక్కడ వేచి ఉన్న కృష్ణా జిల్లా పోలీసులు అయ్యన్నపాత్రుడిని అరెస్ట్ చేసి కృష్ణా జిల్లాకు తరలించినట్లు తెలుస్తోంది.

Read More:   పులివెందుల పిల్లి తాటాకు చప్పుళ్లకు భయపడం :అయ్యన్న అరెస్ట్‌పై అచ్చెన్నాయుడు