ఒకే వేదికమీద ప్రధాని మోడీ, చంద్రబాబు, పవన్ కల్యాణ్.. డేట్ ఫిక్స్

దిశ, వెబ్‌డెస్క్: ఆంధ్రప్రదేశ్‌లో ప్రధాని మోడీ పర్యటన ఖరారైంది. మార్చి 15, 17 తేదీల్లో నిర్వహించబోయే ఎన్నికల ప్రచారంలో పాల్గొననున్నారు. 15న విశాఖలో మోడీ రోడ్ షో, 17న చిలకలూరిపేటలో బీజేపీ, జనసేన, టీడీపీ ఉమ్మడి బహిరంగ సభ నిర్వహించనున్నారు. ఈ సభలో ముఖ్య అతిథిగా ప్రధాని హాజరు కాబోతున్నారు. ఈ విషయాన్ని ఏపీ బీజేపీ అధిష్టానం అధికారికంగా ప్రకటించింది. కాగా, 2014 అసెంబ్లీ ఎన్నికల తర్వాత ఒకే వేదికమీద ప్రధాని మోడీ, చంద్రబాబు, పవన్ కల్యాణ్ కనిపించబోతున్నారు.

అయితే, ఇటీవలే 2024 ఎన్నికల నేపథ్యంలో ఏపీలో టీడీపీ, జనసేన, బీజేపీ పొత్తు కుదిరింది. ఎన్నికల్లో మూడు పార్టీలూ కలిసి పోటీ చేస్తాయని మూడు పార్టీల అధినేతలు వెల్లడించారు. అంతకుముందు కేంద్ర మంత్రి అమిత్ షా నివాసంలో టీడీపీ అధినేత చంద్రబాబు నాయుడు, జనసేనాని పవన్ కళ్యాణ్.. అమిత్ షాతో భేటీ అయ్యారు. సుమారు 50 నిమిషాల పాటు వివిధ అంశాలపై చర్చించారు. పొత్తులు, సీట్ల కేటాయింపు, ఏపీలో రాజకీయ పరిస్థితులపై చర్చించారు. అనంతరం పొత్తుపై అధికారిక ప్రకటన చేశారు.