బాపట్ల జిల్లాలో వ్యక్తి కిడ్నాప్.. సినీ ఫక్కీలో ఆరుగురు నిందితుల అరెస్ట్

దిశ, వెబ్ డెస్క్: హైదరాబాద్‌కు చెందిన కొందరు వ్యక్తులు బాపట్లలో వ్యక్తిని కిడ్నాప్ చేశారు. అనంతరం ఆయనను కారులో హైదరాబాద్ తరలించే ప్రయత్నం చేశారు. అయితే వారిని సినీ ఫక్కీలో పిడుగురాళ్లలో పోలీసులు అరెస్ట్ చేశారు. కాగా హైదరాబాద్‌కు చెందిన రియాజ్ ఆన్ లైన్ వ్యాపారం చేసి మోసపోయారు. దీంతో తీవ్ర దిగ్భ్రాంతికి గురికావడంతో కుటుంబ సభ్యులు ఆస్పత్రిలో చేర్పించారు. దీంతో రియాజ్‌ను తన ఆరుగురు స్నేహితులు పరామర్శించారు. అయితే బాపట్ల జిల్లా చినగంజాం మండలం బేతాళవారిపాలెనికి చెందిన పిల్లి కృష్ణారారావు తన వద్ద రూ. 36 లక్షలు తీసుకున్నారని స్నేహితులకు రియాజ్ చెప్పారు. దీంతో బేతాళవారిపాలెం వెళ్లిన రియాజ్ స్నేహితులు.. కృష్ణారావును కిడ్నాప్ చేసి కారులో హైదరాబాద్ తరలించే ప్రయత్నం చేశారు. అయితే కృష్ణారావు బావమరిది చినగంజాం పోలీసులకు ఫిర్యాదు చేయడంతో సినీ ఫక్కీలో రియాజ్ స్నేహితులను పిడుగురాళ్ల టోల్ ప్లాజా వద్ద అరెస్ట్ చేశారు. చినగంజాంకు తరలించారు. కేసు నమోదు చేసి దర్యాప్తు చేస్తున్నారు.