బాబు అరెస్ట్ అందుకే.. జగన్ టార్గెట్‌గా నారా బ్రాహ్మణి సంచలన ట్వీట్

దిశ, వెబ్‌డెస్క్: టీడీపీ అధినేత చంద్రబాబు అరెస్ట్‌కు సంబంధించి ఏపీ ప్రభుత్వంపై నారా బ్రాహ్మణి తీవ్ర విమర్శలు చేశారు. ఈ మేరకు ట్విట్టర్‌లో వేదికగా జగన్‌పై ఘాటు వ్యాఖ్యలు చేశారు. అభివృద్ది చేసినందుకే చంద్రబాబును జైల్లో పెట్టారని, యువతకు ఉద్యోగాలు ఇవ్వడమే ఆయన చేసిన పాపమా? అంటూ ప్రశ్నించారు. ప్రజలకు మంచి చేయడమే తప్పు అని స్థాయికి రాజకీయాలు దిగజారిపోయాయని, దీనిని బట్టి చూస్తే ప్రజాస్వామ్యం ఎంత ప్రమాదంలో ఉందో అర్థమవతుందని బ్రాహ్మణి ట్విట్టర్‌లో పేర్కొన్నారు.

స్కిల్ డెవలప్‌మెంట్, ఏపీ ఫైబర్ నెట్, అమరావతి ఇన్నర్ రింగ్ రోడ్ అనేవి ప్రజల కోసం చంద్రబాబు తలపెట్టిన పనులు అని, వీటినే నేరాలు అంటున్నారని బ్రాహ్మణి తెలిపారు. సాగునీటి ప్రాజెక్టుల విషయంలో గట్టిగా నిలదీసినందుకు అంగళ్ళు కేసు పెట్టారని బ్రాహ్మణి విమర్శించారు. చంద్రబాబు మీద పెట్టిన కేసులు చూస్తుంటే ఏపీని అభివృద్ధి చేసినందుకే ఆయన్ని అరెస్టు చేసి జైల్లో పెట్టినట్టు ఉందన్నారు. ఒక ముఖ్యమంత్రిగా ప్రజలకు ఉపయోగపడే పని చేయడం తప్పు అనే స్థాయికి రాజకీయం దిగజారిందంటే ప్రజాస్వామ్యం ఎంత ప్రమాదంలో ఉందో గమనించాలని ప్రజలకు బ్రాహ్మణి సూచించారు.