Nuziveedu: అర్ధరాత్రి అత్యంత దారుణం

దిశ, వెబ్ డెస్క్: ఆడపిల్ల అయితే చాలు కొందరు మృగాళ్లు రెచ్చిపోతున్నారు. చిన్న, పెద్దా అనే తేడా లేకుండా అఘాయిత్యాలకు పాల్పడుతున్నారు. అభంశుభం తెలియని చిన్న పిల్లలను సైతం వదిలిపెట్టడంలేదు. బరితెగించి అత్యంత ఘోరాలకు పాల్పడుతున్నారు.  ఏపీలో ఇటీవల కాలంలో బాలికపై లైంగిక దాడి ఘటనలు ఎక్కువ అయ్యాయి.  బాపట్లలో బహిర్భూమికి వెళ్లిన యువతిపై దుండగులు లైంగిక దాడి చేసి చంపేశారు. నంద్యాల, గుంటూరు, అన్నమయ్య జిల్లాలో వరుసగా లైంగిక దాడి ఘటనలు జరిగాయి. ఇవి విచారణలో ఉండగానే మరో ఘటన సంచలనం రేపింది.

నూజివీడు మండలం పల్లెర్లమూడిలో ఆదివారం అర్థరాత్రి దారుణం జరిగింది. తల్లిదండ్రుల వద్ద నిద్రిస్తున్న బాలికను కొందరు దుండగులు ఎత్తుకెళ్లారు. స్థానిక పామాయిల్ తోటలోకి తీసుకెళ్లి లైంగిక దాడి పాల్పడ్డారు. బాలిక ప్రాణాపాయ స్థితిలోకి వెళ్లడంతో దుండగులు పరారయ్యారు. తల్లిదండ్రులు నిద్ర లేచి గాలించారు. పామాయిల్ తోటలో పడి ఉన్న బాలిక గుర్తించి వెంటనే స్థానిక ఆస్పత్రికి తరలించారు. వైద్యులు బాలికను పరీక్షించి లైంగిక దాడి జరిగినట్లు తెలిపారు. అయితే బాలిక పరిస్థితి విషమంగా ఉండటంతో విజయవాడ ఆస్పత్రికి తరలించారు. నిందితులను గుర్తించి కఠినంగా శిక్షించాలని తల్లిదండ్రులు డిమాండ్ చేస్తున్నారు. విషయం తెలుసుకున్న మంత్రి పార్థసారథి ఆగ్రహం వ్యక్తం చేశారు. వెంటనే నిందితులను గుర్తించాలని పోలీసులను ఆదేశించారు. దీంతో నిందితుల కోసం ముమ్మరంగా గాలిస్తున్నారు. స్థానిక సీసీ ఫుటేజుల ఆధారంగా నిందితులను గుర్తించేందుకు ప్రయత్నం చేస్తున్నారు.