ఆర్జీవీ ఎపిసోడ్‌లో కొనసాగుతున్న సస్పెన్స్‌.. ఆర్జీవీ డెన్‌ నుంచి వెనుదిరిగిన ఏపీ పోలీసులు

దిశ, వెబ్ డెస్క్: టాలీవుడ్ ప్రముఖ సినీ దర్శకుడు రామ్ గోపాల్ వర్మ (Ram Gopal Varma) ఎపిసోడ్‌లో సస్పెన్స్ కొనసాగుతోంది. ఏపీ ఎన్నికలకు ముందు ఆర్జీవీ (RGV) తీసిన వ్యూహం సినిమా (Vyuham Movie) విడుదల సమయంలో.. చంద్రబాబు నాయుడు (Chandrababu Naidu), పవన్ కల్యాణ్ (Pawan Kalyan)లపై అనుచిత పోస్టులు పెట్టారు. దీంతో ఆయనపై ప్రకాశం జిల్లాలో టీడీపీ (TDP) నేతల ఫిర్యాదు చేయగా.. కేసులు నమోదు చేసిన పోలీసులు.. విచారణకు హాజరు కావాలని ఒంగోలు పోలీసులు (Ongole Police) స్వయంగా ఇంటికెళ్లి ఆర్జీవీకి నోటీసులు ఇచ్చారు. కాగా ఈ నోటీసులు తీసుకున్న ఆయన పలు మార్లు కోర్టును ఆశ్రయించారు కానీ.. విచారణకు మాత్రం హాజరు కాలేదు.

దీంతో ఆయనకు ఇచ్చిన అవకాశాలు ముగియడంతో.. అర్జీవీ(RGV)ని అరెస్ట్ చేసేందుకు ఒంగోలు పోలీసులు ఆదివారం ఉదయం హైదరాబాద్ వచ్చి చేరుకున్నారు. ఈ క్రమంలోనే జూబ్లీహిల్స్‌లోని ఆర్జీవీ డెన్‌(RGV Den) వద్ద అర్జీవీ కోసం గాలించారు. కానీ ఆయన అక్కడ లేకపోవడంతో ఉదయం నుంచి పోలీసులు అక్కడే ఉన్నారు. దీంతో ఆర్జీవీ ఆఫీస్‌ దగ్గర ఏపీ పోలీసుల హడావిడి నెలకొంది. సెర్చ్‌ వారెంట్‌(Search warrant) లేకపోవడంతో ఉదయం నుంచి లోపలికి వెళ్లకుండా.. అక్కడే ఉన్నారు. ఆర్జీవీ ప్రస్తుతం ఎక్కడున్నారన్న దానిపై ఇప్పటికీ స్పష్టత రాలేదు. అయితే ఆర్జీవీ మాత్రం పోలీసుల నుంచి తప్పించుకునేందుకు ఓ ప్రముఖ హీరో ఇంట్లో తలదాచుకున్నట్లు వార్తలు వస్తున్నాయి.