Breaking: పవన్ కల్యాణ్ వల్లే కాపుల్లో చిచ్చు.. పోసాని మురళి సంచలన వ్యాఖ్యలు

దిశ, వెబ్ డెస్క్: ఏపీలో కాపు రాజకీయం కాక రేపుతోంది. జనసేన అధినేత పవన్ కల్యాణ్ వారాహి యాత్రతో ఇది మరింత ముదిరింది. కాపు నేత ముద్రగడ వర్సెస్ పవన్ కల్యాణ్‌గా సాగుతోంది. అంతేకాదు పవన్ కల్యాణ్ ఫ్యాన్స్, ముద్రగడ మధ్య మాటల యుద్ధం నడుస్తోంది. పవన్ కల్యాణ్‌పై ముద్రగడ చేసిన వ్యాఖ్యలతో పవన్ అభిమానులు సోషల్ మీడియాలో తీవ్ర విమర్శలు చేశారు. అందుకు ముద్రగడ కూడా అదే స్థాయిలో కౌంటర్ ఇచ్చారు. పవన్ కల్యాణ్‌పై పోటీ చేసేందుకు సిద్ధంగా ఉన్నానని అటు ముద్రగడ కూడా సవాల్ విసిరారు.

ఈ నేపథ్యంలో ముద్రగడకు మద్దతుగా సినీ నటుడు, వైసీపీ నేత పోసాని కృష్ణ మురళి కూడా పవన్ కల్యాణ్‌పై తీవ్ర విమర్శలు చేశారు. ముద్రగడ పద్మనాభం గొప్ప నాయకుడని, ఆయన ఏనాడు రాజకీయంగా, ఆర్థికంగా లబ్ధి పొందలేదని సోసాని వ్యాఖ్యానించారు. పవన్ కల్యాణ్ వల్లే కాపుల్లో చిచ్చు రేగిందని మండిపడ్డారు. పవన్ కల్యాణ్ కాపులను తిట్టి చంద్రబాబును పొగడటం ఏంటని ప్రశ్నించారు. చంద్రబాబు డైరెక్షన్‌లోనే పవన్ నడుస్తున్నారని ఆరోపించారు. పవన్ ఎమ్మెల్యేగా గెలుస్తాడో లేదో తెలియదని విమర్శించారు. పవన్ కన్నా ముద్రగడ గొప్ప లీడర్ అని కొనియాడారు. ముద్రగడకు పవన్ కల్యాణ్ క్షమాపణలు చెప్పాలని డిమాండ్ చేశారు. రంగాను చంపించింది చంద్రబాబేనని పోసాని సంచలన వ్యాఖ్యలు చేశారు.