బాణాసంచా ఫ్యాక్టరీలో మరో ప్రమాదం.. ముగ్గురి మృతి

దిశ, వెబ్‌డెస్క్ : తమిళనాడులోని బాణాసంచా ఫ్యాక్టరీల్లో వరుస ప్రమాదాలు చోటుచేసుకుంటున్నాయి. అయినప్పటికీ అక్కడి అధికారులు ఎటువంటి చర్యలు తీసుకున్నట్లు కనిపించడం లేదు. జనావాసాల మధ్య చిన్న చిన్న దుకాణాలు ఏర్పాటు చేసి అందులో బాణాసంచా తయారు చేస్తున్నారు. అనుకోకుండా ప్రమాదం జరిగిన సమయంలో అక్కడి నుంచి వెంటనే బయటపడటం కార్మికులకు కష్టతరంగా మారుతోంది. దీంతో తీవ్రగాయాల పాలై ప్రాణాలు కోల్పోతున్నారు. ఇటీవల తమిళనాడులో మూడు నుంచి నాలుగు పైనే ప్రమాదాలు చోటుచేసుకున్నట్లు సమాచారం.

తాజాగా ఆదివారం మరో ప్రమాదం జరిగింది. ఈ ఘటనలో ముగ్గురు కార్మికులు మృతి చెందగా, పలువురు గాయాలపాలయ్యారు. భారీగా మంటలు ఎగసిపడుతుండటంతో స్థానికులు వాటిని ఆర్పేందుకు యత్నిస్తున్నారు. ఘటనా స్థలికి ఇంకా ఫైర్ ఇంజిన్ చేరుకోలేదు. సమాచారం అందుకున్న పోలీసులు వెంటనే అక్కడికి చేరుకుని పరిస్థితిని అదుపులోకి తీసుకొచ్చేందుకు యత్నిస్తున్నారు. కాగా, ప్రమాదానికి గల పూర్తి వివరాలు తెలియాల్సి ఉంది.