ముగ్గురు రైతులపై 100 మంది దాడి

దిశ, ఏపీ బ్యూరో: తూర్పుగోదావరి జిల్లా రాజానగరం మండలం తూర్పుగోనగూడెం గ్రామంలో అమానుషం జరిగింది. పొలంలో పనులు చేసుకుంటున్న ముగ్గురు రైతులపై సుమారు 100 మంది గుర్తు తెలియని వ్యక్తులు కర్రలు, రాడ్లతో దాడి చేసి భయాందోళన సృష్టించారు. ఈ ఘటన బుధవారం చోటు చేసుకుంది. పోలీసులు తెలిపిన వివరాల ప్రకారం పొలంలో వ్యవసాయ పనులు చేసుకుంటున్న రైతులు గల్లా గణపతి, గల్లా నాని, గల్లా బాబ్జిపై గుర్తుతెలియని దుండగులు ఒక్కసారిగా దాడి చేశారు.

ఈ ఘటనలో ముగ్గురు రైతులు తీవ్రంగా గాయపడ్డారు. గాయపడిన ముగ్గురు వ్యక్తులను 108 వాహనంలో రాజమహేంద్రవరంలోని ఓ ఆస్పత్రికి తరలించి చికిత్స అందిస్తున్నారు. ఆస్తి తగాదాలే ఈ దాడికి కారణమని పోలీసులు అనుమానిస్తున్నారు. కేసు నమోదు చేసిన పోలీసులు విచారణ చేపట్టారు.